Agjencia amerikane antidrogë (DEA) dhe prokuroria e Selanikut kanë arrestuar një shqiptar 50-vjeçar me 580 kg kokainë, sasi e cila do të hidhej në treg.

I arrestuari i lindur në Shqipëri por me pasaportë greke operonte një dyqan familjar bashkë me gruan dhe dy mbesat e tij.

Askush prej tyre nuk ka të kaluar kriminale.

Sasia e drogës u gjet në dy automjete të marra me qira dhe në një banesë ku jetonin tre anëtarë të grupit, me 50-vjeçarin si kryetar.

Sipas autoriteteve greke, i arrestuari importonte sasi të madhe të kokainës nga shtetet e Amerikës Latine drejt territorit grek, por edhe në vendet e tjera europiane.

Grupi po mbahej prej kohësh në vëzhgim dhe u godit të enjten (28 shtator) nga oficerët e policisë dhe Departamenti i Selanikut për Narkotikët.

Një prej të arrestuarve u ndalua gjatë një kontrolli policor, ndërsa shoferi i automjetit të dytë tentoi t’i shpëtojë policisë, por u përplas me murin e një godine.

Në kuadër të operacionit u sekuestruan:

• 585 kg e 200 gramë kokainë të ndara në 500 pjesë;
• 7.440 euro nga trafikimi i drogës;
• 7 telefona për të komunikuar me njëri-tjetrin;
• Detektor për metalet dhe sende të tjera.

/rtsh.al/