Kryeministri Edi Rama do të mbledhë këtë të hënë (9 mars) në orën 10;00 grupin parlamentar të Partisë Socialiste.

Në fokus të kësaj mbledhje do të jetë marrja e qëndrimit mbi kërkesën e prokurorisë për kufizimin e lirisë së Belinda Ballukut. Po ashtu, pritet që në mbledhjen e sotme të bëhet leximi i raportit të socialistëve në Këshillin e Mandateve lidhur me çështjen e Ballukut.

“Sot në 10.00 do të jemi LIVE në Grupin Parlamentar për marrjen e qëndrimit ndaj kërkesës së prokurorit për kufizimin e lirisë së Belinda Ballukut”, shkruan Rama në rrjetin social X.

Tri muaj më parë SPAK i kërkoi Kuvendit të Shqipërisë heqjen e imunitetit të ish-zv.kryeministres Belinda Balluku, e zgjedhur deputete në qarkun e Fierit në zgjedhjet e 11 majit.

Sipas njoftimit zyrtar, Balluku është marrë në cilësinë e të pandehurit në kuadër të procedimit penal nr.136 të vitit 2025, pasi akuzohet për “Shkelje e barazisë së pjesëmarrësve në tendera apo ankande publike”.

Ndërkohë disa ditë më parë, Partia Demokratike publikoi raportin e opozitës në Këshillin për Mandatet dhe Imunitetet lidhur me kërkesën e SPAK për autorizimin e Kuvendit për arrestimin e deputetes Belinda Balluku.

Sipas kreut të grupit parlamentar demokrat, kërkesa është shoqëruar me një relacion të arsyetuar dhe me provat e administruara, ndërsa prokuroria e ka marrë deputeten si person nën hetim dhe të pandehur pasi dyshohet se ka kryer 11 herë veprën penale të “shkeljes së barazisë së pjesëmarrësve në tendera dhe ankande publike”.

/rtsh.al/