Kryeministri në detyrë, Albin Kurti ka deklaruar se menjëherë pas certifikimit të rezultateve të zgjedhjeve të parakohshme që u mbajtën me 7 qershor do të fillojnë komunikimet me partitë politike me synim arritjen e një marrëveshjeje për formimin e institucioneve të reja.

Kosova mbajti zgjedhjet e treta parlamentare brenda 16 muajsh dhe tani duhet të zgjedhë Presidentin e ri. Sipas aktgjykimit të fundit të Gjykatës Kushtetuese, ky proces duhet të nisë menjëherë pas konstituimit të Kuvendit. Komisioni Qendror i Zgjedhjeve planifikon që certifikimin e rezultateve të zgjedhjeve parlamentare të 7 qershorit ta bëjë deri më 6 korrik.

Sipas Kushtetutës së vendit, seanca konstituive duhet të mbahet brenda 30 ditëve nga data e shpalljes zyrtare të rezultateve të zgjedhjeve. Nga të dhënat e publikuara nga KQZ, Lëvizja Vetëvendosje doli fituese e zgjedhjeve duke marrë 53 deputetë, PDK siguroi 22, LDK 18 dhe Aleanca për Ardhmërinë e Kosovës 7 vende në Kuvendin e ri.

Për zgjedhjen e presidentit, çështje për të cilën vendi shkoi në zgjedhje të parakohshme, nevojitet marrëveshje mes partive politike, pasi në dy raundet e para të votimit kërkohet prania në sallë e të paktën 80 deputetëve.

Më herët, nënkryetari i Lidhjes Demokratike të Kosovës Lutfi Haziri deklaroi se partia e tij është e gatshme për bashkëpunim me Lëvizjen Vetëvendosje për të krijuat stabilitet institucional në vend.

/rtsh.al/