Shërbimet e Komisariatit të Policisë Kurbin kanë finalizuar me sukses operacionin e koduar “Reagimi”, pas marrjes së informacionit se në fshatin Adriatik tre shtetas ishin kanosur me armë zjarri.

Menjëherë u organizuan veprimet hetimore dhe operacionale, të cilat çuan në arrestimin në flagrancë të autorit të dyshuar.

Në pranga u vu shtetasi N. N., 34 vjeç, banues në fshatin Adriatik, Kurbin, i cili akuzohet për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Kanosja” dhe “Dëmtime të tjera me dashje”.

Sipas hetimeve, më datë 22 gusht 2026, rreth orës 20:00, ky shtetas ka kanosur me armë zjarri pistoletë, për motive të dobëta, tre persona: N. N., 72 vjeç, M. N., 43 vjeç dhe A. N., 50 vjeç (babai dhe dy djemtë e tij). Gjithashtu, ai ka goditur me grusht shtetasin 50‑vjeçar.

Gjatë kontrollit në banesën e të arrestuarit, policia gjeti dhe sekuestroi në cilësinë e provës materiale armën e zjarrit pistoletë të dyshuar të përdorur për kanosjen, si dhe 2 krehra dhe municion luftarak.

Materialet procedurale i janë referuar Prokurorisë për veprime të mëtejshme, ndërsa Policia e Shtetit thekson se mbetet e angazhuar për garantimin e rendit dhe sigurisë së qytetarëve.

/rtsh.al/