Kryeministri në detyrë, Albin Kurti, ka bërë të ditur se menjëherë pas certifikimit të rezultateve të zgjedhjeve të qershorit do të fillojnë konsultimet për konstituimin e institucioneve të reja të vendit, përfshirë Kuvendin, Qeverinë dhe zgjedhjen e presidentit.

Gjatë mbledhjes së Qeverisë, Kurti tha se rezultatet zgjedhore kanë konfirmuar qartë vullnetin e qytetarëve, duke theksuar se ky vullnet duhet të reflektohet në institucione funksionale dhe efektive.

Ai vlerësoi se vendi nuk kishte nevojë për zgjedhje të reja, por nënvizoi se tani është e rëndësishme që rezultati i dalë nga vota e qytetarëve të respektohet dhe të shndërrohet në institucione demokratike që do të punojnë për zhvillimin ekonomik, mirëqenien sociale, arsimin, shëndetësinë, sigurinë dhe projektet infrastrukturore.

Kurti u ndal edhe te arrestimi i pesë ish-pjesëtarëve të policisë serbe, të dyshuar për përfshirje në masakrën e Reçakut. Ai përgëzoi institucionet përgjegjëse për këtë veprim, duke theksuar se arrestimet erdhën pas një hetimi gjashtëmujor.

Sipas tij, për më shumë se dy dekada ka munguar ndjekja e duhur e përgjegjësve për këtë krim, ndërsa theksoi se në lëndët e trashëguara nga UNMIK-u nuk kishte asnjë rast që lidhej me masakrën e Reçakut.

Kryeministri në detyrë kërkoi përshpejtimin e hetimeve dhe proceseve gjyqësore për krimet e luftës, duke paralajmëruar se kalimi i kohës po e vështirëson sigurimin e dëshmive dhe dëshmitarëve.

/rtsh.al/