Aktori legjendar, fitues dy herë i çmimit Oscar, Michael Douglas, ka lënë të kuptohet se nuk ka plane të afërta për t’u kthyer në aktrim, nëse “nuk ndodh diçka e veçantë”. Deklarata u bë në Festivalin Ndërkombëtar të Filmit në Karlovy Vary, ku 80-vjeçari festonte 50-vjetorin e filmit “One Flew Over the Cuckoo’s Nest”, të cilin e kishte bashkëprodhuar.

“Nuk kam punuar që nga viti 2022 me qëllim sepse e kuptova se duhej të ndalesha,” u tha Douglas gazetarëve. “Kisha punuar shumë për gati 60 vjet dhe nuk doja të isha një nga ata njerëz që binin të vdekur në shesh xhirimi… Jam shumë i lumtur që mora pushim.”

Pavarësisht kësaj, Douglas theksoi se nuk e konsideron veten “në pension”, duke lënë një derë të hapur për projekte me të vërtetë të jashtëzakonshme. “Nuk kam asnjë qëllim të vërtetë për t’u kthyer. Them se nuk jam në pension sepse nëse do të dilte diçka e veçantë, do të kthehesha, por përndryshe jam mjaft i lumtur vetëm duke parë gruan time (aktoren Catherine Zeta-Jones) të punojë.”

Douglas ka ende dy projekte të pa publikuara: filmin “Looking Through Water” dhe miniserialin “Reagan & Gorbachev”, sipas IMDB.

Karriera ikonike dhe beteja me kancerin

Karriera shtatëdekadëshe e Douglas përfshin role të paharrueshme dhe suksese si në aktrim ashtu edhe në prodhim. Ai filloi në vitin 1966 me një rol të pakonfirmuar në “Cast a Giant Shadow”, ku luante edhe babai i tij, Kirk Douglas. Zbulimi i tij erdhi në vitin 1972 me serialin televiziv “The Streets of San Francisco”, përpara se të fitonte Oskarin e tij të parë në vitin 1976 si producent i “One Flew Over the Cuckoo’s Nest”. Oskarin e dytë, këtë herë për Aktorin më të Mirë, e fitoi në vitin 1987 për rolin e tij ikonik në “Wall Street”. Douglas ka luajtur gjithashtu në klasike si “Fatal Attraction” dhe “Romancing the Stone”.

Në vitin 2010, karriera e tij mori një goditje kur u diagnostikua me kancer të fytit në fazën 4. Douglas reflektoi mbi këtë periudhë sfiduese: “Kanceri në fazën 4 nuk është festë, por nuk ka shumë zgjedhje, apo jo? Unë ndoqa programin, që përfshinte kimioterapi dhe rrezatim, dhe isha me fat. Kisha disa miq gjatë asaj kohe që nuk ishin aq me fat…” Ai shtoi se zgjedhja për të mos bërë ndërhyrje kirurgjikale i shpëtoi aftësinë për të folur dhe për të vazhduar karrierën si aktor.

Pas shërimit, Douglas vazhdoi të shfaqej në filma të suksesshëm, duke përfshirë rolin e Dr. Hank Pym në serinë e Marvel “Ant-Man”, “Ant-Man and the Wasp” dhe “Avengers: Endgame”.

/rtsh.al/