Stuhia e fortë që përfshiu Kosovën të martën ka shkaktuar dëmtime të shumta kryesisht në komunat e Suharekës dhe Istogut. Mediat vendase raportojnë se për shkak të stuhive një person ka humbur jetën dhe dy të tjerë janë plagosur.

Instituti Hidrometeorologjik i Kosovës njoftoi se edhe gjatë të mërkurës, vendi do të vijojë të ndikohet nga moti i paqëndrueshëm, me reshje shiu në pjesën më të madhe të territorit, ndërsa ka edhe ulje temperaturash.

Një stuhi me fuqi uragani goditi edhe Maqedoninë e Veriut, ku dëme të shumta materiale u raportuan në Shkup, Kumanovë dhe Tetovë. Më herët edhe Qendra Evropiane për Parashikimin e Stuhive lëshoi nivelin më të lartë të alarmit për një pjesë të rajonit të Ballkanit, duke paralajmëruar stuhi të rrezikshme.

Sipas parashikimit, zonat më të rrezikuara janë jugu i Kroacisë, jugu i Bosnjë-Hercegovinës, Mali i Zi dhe Kosova.

Disa ditë më parë stuhi të forta dhe dëme të shumta materiale të shkaktuara prej tyre u raportuan edhe nga Kroacia, Rumani dhe Bullgaria.

/rtsh.al/