Shëtitja nëpër rrugicat me kalldrëm të qytetit të Beratit, nën dritën e pasdites që pasqyrohet në “qytetin e një mbi një dritareve”, është një përvojë që duket si një udhëtim në kohë.

Kështu e përshkruan gazetarja Annemarije De Boer në një artikull të botuar në platformën ndërkombëtare “NewsBreak”, ku Shqipëria paraqitet si një nga destinacionet më të pazbuluara, por më mbresëlënëse të kontinentit.

Në këtë vend të Trashëgimisë Botërore të UNESCO-s, koha duket se ecën me ritmin e qetë të lumenjve dhe gurëve të lashtë, ndërsa pak kilometra më tutje, Gjirokastra ngrihet mbi luginat e mjegullta me shtëpi guri që ruajnë ende hijeshinë osmane.

Por Shqipëria nuk është vetëm histori. Me bregdetin e saj mesdhetar dhe ujërat ngjyrë bruz të Rivierës Shqiptare, vendi ofron një përzierje të përsosur mes kulturës, natyrës dhe pushimit. Fshatrat shkëmborë të Ksamilit e Himarës mirëpresin vizitorët me darka buzë detit dhe kuzhinë autentike shqiptare.

Sipas artikullit, Shqipëria është kthyer në një perlë të re të udhëtimeve europiane: mbi 8,34 milionë vizitorë e kanë eksploruar vendin deri në gusht të vitit 2025.

Për adhuruesit e aventurës, Bjeshkët e Nemuna dhe rruga Valbonë–Theth ofrojnë një përvojë unike në natyrën shqiptare, mes peizazheve të virgjëra dhe mikpritjes së shtëpive malore që shërbejnë ushqim vendas të gatuar ngadalë.

Sipas Bankës Botërore, “turizmi i trashëgimisë po krijon vende pune dhe po rigjallëron Shqipërinë jugore”, duke u bërë një model zhvillimi të qëndrueshëm që ruan identitetin kulturor.

Koha më e mirë për të zbuluar këtë “sekret të ruajtur mirë të Europës” janë muajt maj, qershor, shtator dhe tetor, kur moti është i ngrohtë dhe rrugët janë më të qeta.

Gazetare: Katerina Kule

/rtsh.al/