James Van Der Beek, aktori që u kthye në ikonën e një brezi të tërë adoleshentësh falë rolit të tij në serialin kult “Dawson’s Creek”, ka ndërruar jetë sot në moshën 48-vjeçare.

Lajmi u konfirmua nga familja e aktorit përmes një deklarate prekëse, ku bëhet e ditur se ai vdiq pas një beteje me kancerin kolorektal, diagnozë të cilën e kishte bërë publike në vitin 2024.

“I dashuri ynë James David Van Der Beek ndërroi jetë në paqe këtë mëngjes. Ai i kaloi ditët e tij të fundit me guxim, besim dhe hir,” shkruan familja, duke kërkuar privatësi në këto momente zie.

Van Der Beek u bë yll ndërkombëtar në fundin e viteve ’90, kur mori rolin e ëndërrimtarit Dawson Leery në dramën adoleshente “Dawson’s Creek” (1998-2003). Seriali lançoi gjithashtu karrierat e Katie Holmes, Michelle Williams dhe Joshua Jackson. Megjithëse për vite me radhë u identifikua vetëm me këtë rol – dhe me “meme-n” e famshme të të qarit që pushtoi internetin – Van Der Beek arriti ta riinventonte veten. Ai tregoi një sens të hollë humori duke luajtur versione të ekzagjeruara të vetvetes në serialin “Don’t Trust the B—- in Apartment 23” apo duke u shfaqur në videoklipe muzikore.

Karriera dhe Jeta

Përveç “Dawson’s Creek”, ai njihet për rolin kryesor në filmin “Varsity Blues” dhe si agjent i FBI-së në “CSI: Cyber”. Së fundmi, në vitin 2024, ai ishte nderuar me një diplomë nderi nga Universiteti Drew, të cilin e kishte braktisur dikur për të ndjekur aktrimin.

Van Der Beek lë pas bashkëshorten e tij, Kimberly, dhe gjashtë fëmijë. Kolegët dhe miqtë, përfshirë Sarah Michelle Gellar, kanë shprehur ngushëllimet e tyre, duke e quajtur humbjen e tij “shkatërruese”.

/rtsh.al/