Protesta e ditës së pestë në Tiranë është shoqëruar me orë të tëra tensionesh dhe përplasjesh mes protestuesve dhe policisë, ndërsa situata është përshkallëzuar nga Ministria e Arsimit deri në bulevardin “Dëshmorët e Kombit” dhe zona të tjera të kryeqytetit.

Tubimi nisi në orën 11:00 para Ministrisë së Arsimit, ku pas disa orësh protestë situata u tensionua me djegien e koshave të mbeturinave, shkuljen e kangjellave të trotuarit dhe hedhjen e gurëve e sendeve të forta në drejtim të efektivëve. Policia ndërhyri me autobotë uji dhe gaz lotsjellës për të shpërndarë turmën.

Më pas, protestuesit u zhvendosën drejt bulevardit “Dëshmorët e Kombit”, ku përplasjet vijuan me hedhjen e molotovëve, gurëve dhe mjeteve piroteknike në drejtim të forcave të rendit. Gjatë tensioneve, një automjeti iu vu flaka, ndërsa në terren mbërritën shërbimet zjarrfikëse.

Pas disa orësh përplasjesh, policia nisi aksionin për largimin e protestuesve nga zona para Kryeministrisë. Në operacion u angazhuan Forcat e Ndërhyrjes së Shpejtë dhe efektivë të Operacionales, të cilët përdorën katër autobotë me ujë për shpërndarjen e turmës dhe lirimin e bulevardit. Gjatë ndërhyrjes nisën edhe shoqërimet e para të personave.

Pas zhvendosjes së protestuesve nga bulevardi, incidentet vijuan në zona të tjera të Tiranës. Protestuesit hodhën molotovë drejt ish-hotel “Dajtit”, ku ndodhen zyrat e Bankës së Shqipërisë, duke i vënë flakën hyrjes së institucionit. Zjarre u raportuan gjithashtu në ambientet e Gjykatës së Lartë, ndërsa u dogjën një biznes dhe automjete në zonën pranë saj.

Më pas të rinjtë u shpërndanë në rrugët e kryeqytetit, ku protestuesit dëmtuan edhe kioska e tabela sinjalistike, u vunë flakën kazanëve të mbeturinave duke shkaktuar kaos në Tiranë. Si pasojë e incidenteve, në disa zona u regjistruan dëme materiale, ndërsa forcat e policisë vijuan ndërhyrjet për menaxhimin e situatës.

Në terren para Kryeministrisë ishte edhe drejtori i Përgjithshëm i Policisë së Shtetit, Skënder Hita, i cili ndoqi nga afër zhvillimet gjatë përplasjeve dhe operacionit për shpërndarjen e protestuesve. Protesta e sotme vjen pas pesë ditësh tubimesh në Tiranë, ndërsa përshkallëzimi i saj është shoqëruar me dëme në pronën publike dhe private, të lënduar dhe ndërhyrje të përsëritura të forcave të rendit. Nga protestat e sotme 34 persona janë lënduar, mes tyre 21 efektivë policie dhe 13 protestues.

Gurë, molotovë e gaz lotsjellës, çfarë ndodhi gjatë përshkallëzimit të protestës para Kryeministrisë

Efektivët përparuan në terren, duke ushtruar presion për zhvendosjen e protestuesve dhe lirimin e hapësirës përpara Kryeministrisë. Pas ndërhyrjes, turma u shpërnda nga bulevardi, ndërsa kanë nisur dhe shoqërimet e para nga efektivët.

Pas shpërndajes nga Kryeministria, protestuesit kanë hedhur molotovë drejt ish-hotel ‘Dajtit’ ku ndodhen zyrat e Bankës së Shqipërisë duke i vënë flakën hyrjes së bankës.

Aksioni i policisë erdhi pas përplasjeve të vazhdueshme gjatë protestës, ku protestuesit hodhën gurë, molotovë dhe mjete piroteknike në drejtim të efektivëve. Tensionet u përshkallëzuan edhe më tej kur një automjeti iu vu flaka në bulevard, duke bërë të nevojshme ndërhyrjen e shërbimeve zjarrfikëse për shuarjen e zjarrit.

Në terren ishte edhe drejtori i Përgjithshëm i Policisë së Shtetit, Skënder Hita, i cili ndoqi nga afër zhvillimet. Ndërkohë, efektivët krijuan një kordon sigurie dhe vijuan ndërhyrjen për largimin e protestuesve nga bulevardi.

Protesta e sotme është dita e pestë e tubimeve në Tiranë. Ajo nisi në orën 11:00 para Ministrisë së Arsimit, ku pas disa orësh protestë situata u përshkallëzua me djegien e koshave të mbeturinave, shkuljen e kangjellave të trotuarit dhe hedhjen e gurëve në drejtim të policisë.

Pas përplasjeve pranë ministrisë, turma u zhvendos drejt bulevardit “Dëshmorët e Kombit”, ku tensionet vijuan me hedhjen e molotovëve dhe mjeteve piroteknike, përdorimin e gazit lotsjellës dhe ndërhyrjen e policisë me ujë për shpërndarjen e protestuesve.

Plagoset shefi i Komisariatit Nr. 3 gjatë protestës, merr 12 të qepura në kokë

Shefi i Komisariatit Nr. 3 në Tiranë ka mbetur i plagosur gjatë protestës së sotme, e cila u shoqërua me përplasje të forta mes protestuesve dhe forcave të policisë.

Sipas informacioneve, ai ka pësuar dëmtime në kokë dhe ka marrë 12 të qepura për shkak të plagës së shkaktuar.

Ngjarja vjen pas orësh të tëra tensionesh në kryeqytet, ku protestuesit kanë hedhur gurë, molotovë dhe mjete piroteknike në drejtim të efektivëve, ndërsa policia ka ndërhyrë me gaz lotsjellës dhe autobotë uji për shpërndarjen e turmës.

 

View this post on Instagram

 

A post shared by RadioTelevizioni Shqiptar (@rtshqiptar)

Efektivi goditet nga protestuesit, i merr flakë këmba. Ndërhyjnë në kohë kolegët, dërgohet në spital

Një efektiv policie është dëmtuar gjatë protestës në bulevardin “Dëshmorët e Kombit” në Tiranë, pas hedhjes së mjeteve piroteknike dhe molotovëve në drejtim të forcave të rendit.

Efektivi është goditur nga protestuesit, ku këmba e tij ka marrë flakë, por kanë qenë kolegët e tij ata që kanë ndërhyrë menjëherë për të shuar flakët dhe për t’i dhënë ndihmën e parë, përpara se efektivi të transportohej me ambulancë drejt spitalit për trajtim mjekësor.

Ndërkohë, situata në bulevard vijon të jetë e tensionuar, me protestuesit që vazhdojnë të hedhin fishekzjarrë dhe molotovë në drejtim të efektivëve të policisë, pavarësisht ndërhyrjes së forcave të rendit për shpërndarjen e turmës.

Aksioni i policisë për largimin e protestuesve, FNSH dhe Operacionalja ndërhyjnë me 4 autobotë uji

Policia ka nisur një aksion të menjëhershëm për largimin e protestuesve nga bulevardi “Dëshmorët e Kombit” në Tiranë, pas orësh të tëra tensionesh dhe përplasjesh. Me mbërritjen e forcave të FNSH-së dhe të Operacionales, strategjia e efektivëve në terren ka ndryshuar, ndërsa ka nisur ndërhyrja për shpërndarjen e turmës.

Në zonë janë angazhuar katër autobotë me ujë, të cilët po përdoren për të larguar protestuesit, ndërsa efektivët po përparojnë në terren për të liruar bulevardin.

Ndërhyrja vjen pas përplasjeve të vazhdueshme mes protestuesve dhe forcave të rendit, gjatë të cilave janë hedhur gurë, molotovë dhe mjete piroteknike. Situata është tensionuar edhe më tej pas djegies së një automjeti në bulevard.

Tensione para Kryeministrisë, Skënder Hita zbret në terren, ndjek nga afër situatën 

Drejtori i Përgjithshëm i Policisë së Shtetit, Skënder Hita, i është bashkuar forcave të policisë në terren, në bulevardin “Dëshmorët e Kombit” në Tiranë, ku situata vijon të mbetet e tensionuar.

Hita po ndjek nga afër zhvillimet dhe situatën në terren, pas përplasjeve të regjistruara mes protestuesve dhe efektivëve të policisë. Tensionet kanë vijuar gjatë protestës, ndërsa në bulevard janë shënuar incidente, përfshirë hedhjen e mjeteve piroteknike dhe djegien e një automjeti.

Prania e kreut të Policisë së Shtetit vjen në një moment kur përplasjet vijojnë dhe forcat e rendit janë të angazhuara për menaxhimin e situatës.

Tensione të forta para Kryeministrisë, i vihet flaka një makine, protestuesit përplasen me policinë

Protesta në Tiranë vijon mes tensioneve të forta para Kryeministrisë, ku tymi, flakët dhe gazi lotsjellës kanë mbuluar bulevardin “Dëshmorët e Kombit”. Protestuesit vijojnë të qëndrojnë në zonë, ndërsa efektivët e policisë janë tërhequr më tej, duke krijuar një kordon sigurie.

Në bulevard, protestuesit i kanë vënë flakën një automjeti, ndërsa në vendngjarje kanë mbërritur shërbimet zjarrfikëse për të shuar zjarrin. Situata është përshkallëzuar edhe më tej, pasi protestuesit kanë hedhur gurë, molotovë dhe mjete piroteknike në drejtim të efektivëve.

Nga ana tjetër, policia ka ndërhyrë me gaz lotsjellës dhe ujë në përpjekje për të larguar turmën dhe për të rikthyer kontrollin në zonë. Megjithatë, protestuesit janë kundërpërgjigjur me gurë dhe mjete piroteknike, ndërsa përplasjet mes tyre dhe forcave të rendit vijojnë herë pas here.

Protestuesi humb ndjenjat në bulevard, transportohet me ambulancë në spital

Një protestues ka humbur ndjenjat në bulevardin “Dëshmorët e Kombit”, në Tiranë.  Ai është ndihmuar fillimisht nga protestuesit e tjerë që ndodheshin pranë tij, ndërsa pak minuta më vonë në vendngjarje ka mbërritur ambulanca.

Personeli mjekësor i ka dhënë ndihmën e parë, përpara se ta transportonte drejt spitalit për trajtim të mëtejshëm.

Çfarë ndodhi gjatë katër orëve të protestës para Ministrisë së Arsimit?

Protesta studentore, e cila ka hyrë sot në ditën e pestë, nisi në orën 11:00 para Ministrisë së Arsimit në Tiranë, ku nxënës, studentë dhe qytetarë u mblodhën për të protestuar. Tubimi ishte paralajmëruar si një protestë gjithëpërfshirëse kombëtare, me pjesëmarrjen e gjimnazistëve, studentëve dhe qytetarëve.

Për orë të tëra, protesta vijoi para godinës së ministrisë, ndërsa situata nisi të tensionohej pas mesditës. Fillimisht, disa prej protestuesve shkulën kangjellat e trotuarit pranë institucionit dhe i vendosën në mes të rrugës, duke penguar qarkullimin. Më pas, disa kosha mbeturinash u përfshinë nga flakët, duke bërë që situata të përshkallëzohej.

Në këto momente, Policia ndërhyri me makinat ujëhedhëse për të larguar koshat e mbeturinave nga rruga dhe për të shpërndarë protestuesit. Por ndërhyrja u shoqërua me përplasje, pasi një pjesë e protestuesve nisën të hedhin gurë dhe sende të forta në drejtim të forcave të rendit.

Tensionet u shtuan edhe më tej kur, sipas raportimeve nga terreni, në drejtim të efektivëve u hodhën bomba molotov. Përballë kësaj situate, policia vijoi ndërhyrjen me ujë, duke u përpjekur të largonte turmën nga zona pranë Ministrisë së Arsimit dhe të rikthente kontrollin në rrugë.

Gjatë këtyre orëve, situata mbeti e tensionuar, ndërsa forcat e rendit ndërhynë për të mbrojtur institucionin dhe për të menaxhuar përshkallëzimin e protestës.

/rtsh.al/