Sokol Hoxha, 51-vjeçari i ekstraduar nga Shtetet e Bashkuara të Amerikës, ka mbërritur këtë të hënë në Gjykatën e Fierit, nën masa të rrepta sigurie, ku do të shqyrtohet kërkesa e tij për shpalljen e parashkrimit të dënimit penal.

Hoxha, nga Patosi, është dënuar në vitin 2000 nga Gjykata e Fierit me 25 vite burg në mungesë, për vrasjen e dy vëllezërve Banaj në vitin 1997. Ai është dënuar gjithashtu me burgim të përjetshëm nga drejtësia belge për vrasjen e Brunilda Dervishit.

Pas më shumë se 26 vitesh nga vendimi i Gjykatës së Fierit, Hoxha kërkon që dënimi të shpallet i parashkruar, duke iu drejtuar gjykatës për të përfituar nga mekanizmat e parashikuar në legjislacionin penal. Kërkesa e tij lidhet me periudhën e gjatë gjatë së cilës dënimi me 25 vite burg nuk është ekzekutuar.

51-vjeçari u arrestua në Shtetet e Bashkuara në muajin maj, në kuadër të operacionit “Globi”, falë bashkëpunimit mes agjencive ligjzbatuese të Shqipërisë, Belgjikës dhe SHBA-së. Ai u ekstradua në Shqipëri më 6 gusht dhe u dërgua në burgun e Fierit për të vuajtur dënimin e dhënë në vitin 2000.

Seanca e mëparshme, e zhvilluar një javë më parë, u shty për këtë të hënë, me qëllim marrjen e informacionit nga Gjykata e Lartë lidhur me vendimmarrjen më të fundit për çështjen.

Përpara trupës gjykuese, të përbërë nga gjyqtarja Aurora Tusha, prokurorja Malbora Dinaj dhe avokatët Toto Avdija e Rozeta Plaku, Hoxha do të përballet me shqyrtimin e kërkesës së tij për shuarjen e dënimit penal.