Administrata e Trumpit kërcënoi se mund të ndalojë ndarjen e informacioneve të inteligjencës me Ukrainën nëse Kievi nuk ndalon sulmet ndaj rafinerive të naftës ruse, raportojnë mediat ukrainase duke cituar një intervistë që presidenti ukrainas Volodymyr Zelensky i dha NPR-së.

“Administrata Trump paralajmëroi se mund të ndërpresë ndarjen e informacioneve të inteligjencës me Ukrainën nëse forcat ukrainase nuk ndalojnë sulmet me dronë me rreze të gjatë ndaj rafinerive të naftës brenda Rusisë”, raportoi NPR, duke cituar presidentin ukrainas Volodymyr Zelensky.

Zelensky shtoi se gjeneralët e tij e kishin informuar se paralajmërimi ishte komunikuar në nivel ushtarak.

Ai i tha se Ukraina po sulmonte objektet energjetike dhe logjistike ruse për të dobësuar aftësinë e Kremlinit për të zhvilluar luftën.

Zelensky deklaroi se Ukraina dëshironte të mbaronte luftën, por do të vazhdonte sulmet derisa Rusia të ndalonte sulmet ndaj objekteve energjetike ukrainase.

Presidenti ukrainas tha se vendimi i Trumpit për të hequr përkohësisht sanksionet ndaj naftës dizel ruse nuk do të ndikonte në çmimet në Shtetet e Bashkuara, sepse volumet e disponueshme ishin të pamjaftueshme.

Zelensky zbuloi gjithashtu se për armëpushimin energjetik të propozuar nga Trump kishte mësuar përmes mediave sociale.

Ai refuzoi gjithashtu pretendimin e presidentit Trump, të bërë gjatë fundjavës, se Ukraina ishte përgjegjëse për rritjen e çmimeve të naftës dizel. Zelensky theksoi se rritja ishte shkaktuar nga lufta që përfshin Iranin.

“Shumica e njerëzve në botë e dinë pse u rritën çmimet e çdo lloji të energjisë, përfshirë naftën dizel. Sepse Hormuzi. Po. Sepse bllokimi i Ngushticës së Hormuzit”, tha ai.

/rtsh.al/