Jo të gjithë janë adhurues të ushqimeve pikante dhe kjo shpesh varet nga vendi ku jetoni apo kultura me të cilën jeni rritur. Në shumë vende, si Meksika, India apo Koreja e Jugut, specat djegës janë një përbërës i pandashëm i kuzhinës tradicionale dhe konsumohen që në fëmijëri.

Konsumimi i ushqimeve pikante nuk ka të bëjë vetëm me sfidën e djegies në gojë apo me shijen unike që ato ofrojnë. Ato kanë ndikime të vërteta pozitive në shëndetin tonë, dhe shumë prej tyre i detyrohen kapsaicinës përbërësi aktiv që gjendet në specat djegës.

Kapsaicina stimulon metabolizmin, nxit djegien e kalorive dhe ndihmon në uljen e oreksit. Një studim i vitit 2017 tregoi se ajo luan një rol të rëndësishëm në shëndetin metabolik dhe është veçanërisht e dobishme për personat që vuajnë nga obeziteti.

Kapsaicina nuk ka efekt vetëm kur hahet ajo përdoret edhe në trajtime topikale. Xheli me përqendrim 2.5% deri në 8% të kapsaicinës janë efektivë në reduktimin e dhimbjes tek ata që vuajnë nga osteoartriti apo dhimbjet neuropatike.

Është një mit i përhapur që ushqimet pikante shkaktojnë ulçera në stomak. Në të vërtetë, kapsaicina ndihmon në reduktimin e aciditetit në stomak dhe mund të ketë efekt mbrojtës ndaj mukozës së stomakut.

Specat pikantë janë të pasur me antioksidantë si vitamina A dhe C. Këta elementë ndihmojnë në mbrojtjen e qelizave nga radikalet e lira, duke ulur rrezikun për shumë sëmundje kronike.

Hulumtime të hershme në laboratorë kanë zbuluar se kapsaicina mund të shkatërrojë qeliza të kancerit të prostatës pa dëmtuar qelizat e shëndetshme. Një rishikim sistematik i studimeve sugjeron se kjo substancë ka potencial premtues në trajtime kundër kancerit të mushkërive dhe të prostatës.

Një studim i gjerë tregoi se njerëzit që konsumonin ushqime pikante pesë deri në shtatë herë në javë kishin një ulje prej 14% të rrezikut të vdekjes nga çdo shkak, në krahasim me ata që i konsumonin më rrallë.

Efektet anti-inflamatore të kapsaicinës janë të krahasueshme me ato të barnave si diklofenaku. Gjithashtu, ajo ndihmon në uljen e kolesterolit LDL (“i keqi”) dhe rritjen e HDL (“i miri”), duke përmirësuar qarkullimin e gjakut dhe duke ulur rrezikun për sëmundje të zemrës.

/rtsh.al/