Një familje nga Republika Çeke ka nisur një udhëtim të gjatë përmes vendeve të Ballkanit, duke përfshirë edhe Shqipërinë.

Prej dy javësh ata po eksplorojnë veriun dhe jugun e vendit me kamperin e tyre të ndërtuar me dorë nga vetë kryefamiljari. Ndalesa e tyre e fundit ishte në veri, për të shijuar natyrën dhe shtigjet malore, pas disa ditësh relaksi në plazhet shqiptare.

“E kemi nisur nga Mali i Zi. Në Shqipëri do të qëndrojmë dy javë. Filluam nga veriu. Qëndruam në Theth dhe lëvizëm në disa plazhe të jugut,” thotë turisti nga Çekia.

Kamperin e ka përshtatur sipas nevojave të tyre. 

“Këtë kamper po e përdorim prej dy vitesh. Doja ta krijoja siç kisha dëshirë vetë, kështu që çdo gjë brenda e kam instaluar unë,” thotë ai.

Në restorante konsumojnë vetëm ushqim tradicional. 

“Na sollën byrek dhe perime,” shton ai.

Të mahnitur nga mikpritja, ushqimi tradicional dhe peizazhet e ndryshme, familja çeke shprehet se Shqipëria i ka tejkaluar pritshmëritë e tyre.

“Turizmi në Shqipëri i ka kaluar pritshmëritë tona dhe gjithçka duket mirë. Ka gjithçka që na nevojitet,” shprehet turisti.

Me ndjesinë se kanë gjetur gjithçka që u nevojitet për një udhëtim të rehatshëm, ata do të vijojnë rrugëtimin drejt Kosovës dhe Serbisë, përpara se të kthehen në Çeki. 

Gazetare: Irda Bajraktari

/rtsh.al/