Mikpritja e korçarëve, serenatat si dhe gatimet tradicionale, krijojnë një panoramë të mrekullueshme për qytetin juglindor. Ajo që e bën Korçën të veçantë është qetësia ndërsa pamjet e qytetit ndryshojnë nga një lagje në tjetrën.

Është “Pazari i Vjetër” i Korçës siç është quajtur që prej krijimit të tij ai që më së shumti tërheq turistët. Ata janë çdo vit e më të shumtë, të bindur se në Korçë do të gjejnë diçka ndryshe nga çfarë kanë parë në qytetet e tjera.

“Në Francë pamë një reportazh për Shqipërinë në televizion dhe vendosëm të vijmë. Është hera ime e parë në Shqipëri, sot është dita e dytë që kam mbërritur në këtë vend, është një vend shumë i këndshëm”, u shpreh një turist.

“Jemi nga Franca. Me pëlqejnë destinacionet kulturore dhe kam rezervuar për këtu nëpërmjet internetit. Më pëlqen mikpritja e njerëzve këtu, ju jeni gjithmonë të qeshur, i ndihmoni turistët nëse kanë nevojë për informacion për qytetin, kemi shijuar edhe specialitete të kulinarisë këtu që na kanë pëlqyer shumë”, tha një turiste.

“Jam nga Maqedonia e Veriut. Jam këtu për një projekt dhe mendoj se Korça është një qytet shumë i bukur, po kalojmë vërtet një kohë shumë të bukur. Më pëlqen arkitektura, kjo pjesë e pazarit të vjetër, gjithashtu ndërtesa të tjera si katedralja, e cila më pëlqeu shumë, është plot jetë e kulturë”, tha një tjetër turiste.

“Pazari i Vjetër” i Korçës vazhdon të jetë një nga vendet e vizituara masivisht nga turistë vendas e të huaj gjatë këtij sezoni veror. Ky destinacion turistik i cili ofron një gërshetim interesant mes traditës, kulturës e argëtimit është mjaft i frekuentuar në çdo ditë të javës.

Gazetare: K. Koçi

/rtsh.al/