Një sulm kibernetik ka ndërprerë funksionimin e sistemeve automatike të regjistrimit dhe imbarkimit në disa aeroporte të mëdha evropiane, përfshirë Heathrow në Londër, Bruksel dhe Berlin.

Ky incident ka shkaktuar vonesa dhe anulime fluturimesh, duke detyruar përdorimin e procedurave manuale për pasagjerët.

Operatorët e aeroportit të Brukselit njoftuan se sistemi i automatizuar është jashtë funksioni dhe se vetëm regjistrimi manual është i mundur për momentin. Ata paralajmëruan se kjo situatë do të ndikojë në orarin e fluturimeve, duke shkaktuar vonesa dhe anulime.

Heathrow gjithashtu raportoi për një “problem teknik” te një furnizues i palës së tretë, duke çuar në vonesa të fluturimeve. Aeroporti i Berlinit tha se problemi ka shkaktuar kohë më të gjata pritjeje gjatë regjistrimit dhe po punohet për një zgjidhje të shpejtë.

Kompania Collins Aerospace, që furnizon këto sisteme, konfirmoi se po përballet me një “çrregullim me natyrë kibernetike”.

Aeroportet e prekura kanë kërkuar nga pasagjerët që të kontrollojnë statusin e fluturimit me kompanitë ajrore përpara se të nisen për në aeroport.

Ky incident ka nxjerrë në pah edhe njëherë rëndësinë e sistemeve automatike dhe rrezikun që ato paraqesin kur bien pre e sulmeve kibernetike.

Për momentin, autoritetet po punojnë për të rikthyer funksionimin normal të sistemeve dhe për të parandaluar incidente të ngjashme në të ardhmen.

/rtsh.al/