Instituti i Sigurisë Ushqimore dhe Veterinarisë (ISUV) ka shënuar një transformim të thellë, duke zgjeruar në mënyrë drastike kapacitetet e tij analitike. Këtë e bëri të ditur Ministri i Bujqësisë dhe Zhvillimit Rural, Andis Salla, gjatë një vizite të zhvilluar të premten në ambientet e institutit.

Nga vetëm 6 analiza të akredituara në vitin 2013, sot ISUV numëron plot 1,945 teste të certifikuara, të cilat janë riakredituar sipas standardit ndërkombëtar ISO 17025:2017 dhe janë të vlefshme deri në vitin 2029.

Ministri Salla theksoi se: “Zgjerimi përfshin edhe 12 analiza të reja për substanca të ndjeshme, siç janë tetraciklinat në mjaltë dhe nitrofuranet në qumësht. Kjo arritje e vendos Shqipërinë në të njëjtin nivel kontrolli me vendet e Bashkimit Evropian për sa i përket sigurisë ushqimore.”

Gjatë vizitës, ministri u njoh me punën e përditshme të specialistëve që garantojnë sigurinë e zinxhirit ushqimor, “nga ferma në tryezën e çdo familjeje shqiptare”.

“Sigurojmë cilësi për konsumatorin, besim për fermerin dhe besueshmëri për produktet shqiptare në tregjet ndërkombëtare,” deklaroi ministri Salla, duke e lidhur këtë transformim me profesionalizmin e burimeve njerëzore dhe investimet e qëndrueshme.

Mbështetja ndërkombëtare dhe vizioni “Bujqësia 2030”

Ky fuqizim i ISUV-it mbështetet edhe nga partnerët ndërkombëtarë. Veçohet projekti i Bankës Botërore, që po financon investime në 7 laboratorë rajonalë dhe 6 Pika të Inspektimit Kufitar (PIK), duke e forcuar rolin e ISUV-it si institucion kombëtar referencë.

Ministri Salla theksoi se këto përpjekje janë pjesë e vizionit “Bujqësia 2030”, i cili synon ngritjen e standardeve kombëtare të cilësisë.

Kjo është thelbësore edhe për përmbushjen e detyrimeve të Kapitullit 12 (Siguria Ushqimore) në kuadër të procesit të integrimit europian të Shqipërisë.

/rtsh.al/