Një ditë pasi kryeministri grek, Kiriakos Mitsotakis ka përfshirë në buxhetin e vitit të ardhshëm mbështetje shtesë me vlerën e 160 milionë eurove për fermerët, këta të fundit vijojnë të jenë të palëkundur në bllokadat që kanë ngritur në pikat kryesore të kalimit kufitar me Maqedoninë e Veriut dhe Bullgarinë.

Bllokadat e ngritura në pikat e kalimit të Greqisë me dy vendet fqinje vijojnë të shkaktojnë probleme në qarkullimin e automjeteve, pasi nuk lejohet kalimi i kamionëve dhe automjeteve të tjera të tonazhit të rëndë.

Të nxitur nga bllokimi i fondeve të BE-së për bujqësinë, të cilat lëshohen nga agjencia e pagesave të bujqësisë për shkak të një hetimi që ka lidhje me një skemë mashtrimi me këto fonde, fermerët prej disa javësh kanë mbajtur protesta, duke theksuar se bujqësia ndodhet në një rrugë pa krye dhe duke kërkuar masa konkrete dhe të menjëhershme.

Ata kërkojnë kompensim për të ardhurat e humbura, çmime minimale të garantuara për të korrat, heqjen e taksave për karburantin që përdorin dhe kosto të reduktuara të energjisë elektrike.

Ndërkaq, hetimi i zyrës së prokurorit publik europian, i cili fillimisht goditi një organizatë kriminale që vepronte në Kretë, anëtarët e së cilës kishin përfituar në mënyrë të padrejtë fonde europiane, është zgjeruar gati në të gjithë vendin.

Hetuesit thonë se janë të paktën tetë rrjete të dyshuara që vepronin sipas një skeme ku pranë zyrave të agjencisë së pagesave për bujqësinë paraqiteshin deklarata dhe aplikime të rreme në mënyrë që të përfitoheshin subvencionet e BE-së.

Sakaq vijon edhe këtë të mërkurë (17 dhjetor) bllokimi për 3 orë i aksit rrugor Kakavijë-Janinë. 

/rtsh.al/