Një histori suksesi vjen nga Shkolla Profesionale “Hamdi Bushati” në Shkodër. Maturanti Sidgen Mlloja, pasi përfundoi klasën duale në drejtimin hoteleri–turizëm, sot është punësuar dhe ka hedhur hapat e parë në tregun e punës ndonëse është ende në bankat e shkollës.

“Hoteleri-turizëm është pasioni im i cili lidhet dhe me kuzhinën dhe jam rritur edhe më shumë”, u shpreh Sidgen Mlloja, Maturant i shkollës “Hamdi Bushati”.

Teoria u ndërthur me praktikën në biznes, e ndihmoi të fitojë aftësi konkrete dhe ta ketë më të lehtë integrimin në punë. Sidgeni thotë se të ardhmen e sheh pikërisht në sektorin e turizmit, një fushë që sipas tij ofron mundësi të mëdha zhvillimi dhe karriere.

Drejtoresha e shkollës profesionale “Hamdi Bushati”Merita Zeneli,  thekson se institucioni që ajo drejton ofron tre drejtime kryesore studimi, të cilat janë të lidhura ngushtë me kërkesat e tregut të punës.

“Shkolla Hamdi Bushati ofron 3 drejtime dhe numri i nxënësve është mbi 650 nxënës dhe pjesa më e madhe janë orientuar drejt hoteleri-turizmit”, u shpreh Merita Zeneli, Drejtore Shkolla profesionale “Hamdi Bushati”.

Sipas saj, vitet e fundit vihet re një interes në rritje nga nxënësit për drejtimin e hoteleri–turizmit, i cili mbetet edhe një nga më të preferuarit. Aktualisht kjo shkollë ka rreth 650 nxënës duke qënë pjesë e rëndësishme e edukimit të brezit të ri në veri të vendit.

Gazetare: M. Gjoni  

/rtsh.al/