Policia Rrugore e Tiranës ka vijuar monitorimin intensiv 24 orë në 7, duke u përqendruar në akset rrugore me frekuentim të lartë, me qëllim parandalimin e aksidenteve dhe ndëshkimin e shkelësve të rregullave të qarkullimit. Gjatë kontrolleve të zhvilluara në 72 orët e fundit, bilanci i masave ka qenë i lartë, duke prekur disa fusha të sigurisë rrugore.

Si rezultat i aksioneve, autoritetet kanë arrestuar 7 drejtues mjetesh për vepra penale në fushën e qarkullimit, kanë bllokuar 22 mjete dhe kanë tërhequr 20 leje qarkullimi.

Rasti i korrupsionit në rrugën “Urani Pano”

Në kuadër të kontrolleve, është proceduar penalisht edhe 1 drejtues mjeti. Ai u konstatua duke drejtuar automjetin në rrugën “Urani Pano” nën efektin e alkoolit, në masën 0.17 mg/l. Për të shmangur masën administrative përkatëse, drejtuesi i mjetit ka tentuar të korruptojë punonjësit e Policisë duke i ofruar 2,000 lekë.

Shifrat e masave administrative

Në total, Policia Rrugore ka vendosur 6,819 masa administrative për shkelje të ndryshme. Ndër shkeljet më të shpeshta të evidentuara gjatë kësaj periudhe spikasin:

• 5,062 raste për qëndrim të gabuar;
• 641 raste për mospërdorim të kaskës mbrojtëse ose jelekut fosforeshent;
• 289 raste për mosrespektim të sinjalistikës rrugore;
• 193 raste për mosvendosje të rripit të sigurimit;
• 166 raste për mosdhënie përparësie këmbësorëve;
• 164 raste për përdorim të celularit gjatë drejtimit të mjetit;
• 74 raste për parakalime të gabuara;
• 59 raste për tejkalim të shpejtësisë;
• 10 raste për drejtim mjeti në efektin e alkoolit, krahas masave të tjera për shkelje të ndryshme.

Në prag të fundjavës, Policia Rrugore e Tiranës i bën thirrje të gjithë përdoruesve të rrugës për kujdes të shtuar, respektim të kufijve të shpejtësisë dhe sinjalistikës, përdorim të detyrueshëm të rripit dhe kaskës mbrojtëse, si dhe shmangie absolute të drejtimit të mjetit nën efektin e alkoolit. Autoritetet theksojnë se kontrollet do të vijojnë pa ndërprerje për garantimin e sigurisë publike.

/rtsh.al/