Teksa Parlamenti pritet të nisë punimet për seancën plenare, protestuesit janë pozicionuar para godinës së Kuvendit, në vijim të protestës kundër qeverisë. Nga terreni, gazetarja e RTSH-së, Flutura Tota, raporton se situata aktualisht është e qetë, ndërsa pritet që pas përfundimit të seancës veprimet e protestuesve të intensifikohen.

Për garantimin e rendit dhe sigurisë, Policia e Shtetit ka angazhuar qindra efektivë nga disa struktura, me qëllim që punimet e Kuvendit të zhvillohen pa incidente dhe të shmangen përplasjet mes protestuesve dhe deputetëve.

Gazetarja thekson se sipas informacioneve paraprake, dy persona janë shoqëruar pas përplasjeve verbale me efektivët.

Ndërkohë, forcat e rendit po monitorojnë situatën jo vetëm pranë Kuvendit, por edhe protestat e tjera të zhvilluara në kryeqytet, të cilat vijojnë prej 116 ditësh.

/rtsh.al/