Ministri i Drejtësisë, Toni Gogu, paraqiti në Komisionin e Ligjeve Konventën e Këshillit të Evropës për Mbrojtjen e Profesionit të Avokatit, në kuadër të procedurës për ratifikimin e saj nga Kuvendi.

Në fjalën e tij, ministri Gogu vuri në qendër qytetarin dhe të drejtën e tij për një mbrojtje efektive përballë pushtetit të shtetit, duke theksuar se çështja nuk lidhet thjesht me një profesion.

“Çështja që trajtohet sot nuk është një çështje thjesht e profesionit të avokatit, por ka të bëjë me thelbin kur secili prej nesh gjendet përballë pushtetit të shtetit”, u shpreh Gogu.

Konventa synon të garantojë kushtet që avokati ta ushtrojë profesionin në mënyrë të lirë dhe të pavarur, duke mbrojtur lirinë e shprehjes, konfidencialitetin e komunikimit avokat–klient, mbrojtjen nga kërcënimet dhe ngacmimet, si dhe procedura disiplinore të drejta dhe proporcionale.

Ministri theksoi se këto garanci nuk i japin avokatit imunitet nga ligji, por mbrojnë kushtet në të cilat ai ushtron funksionin e tij në shtetin e së drejtës.

Gogu nënvizoi gjithashtu se një drejtësi e fortë nuk ndërtohet duke dobësuar njërën palë në proces.

“Një sistem i drejtë kërkon që prokurori të ketë të gjitha mjetet për të hetuar, gjykata të jetë e pavarur për të kontrolluar ligjshmërinë dhe mbrojtja e lirë për të kundërshtuar shtetin kur ligji dhe faktet e kërkojnë. Fuqia e njërës nuk matet me dobësimin e tjetrës”, tha ai.

Konventa parashikon edhe monitorimin e zbatimit të saj nga GRAVO, grup ekspertësh të pavarur të Këshillit të Europës.

Sipas ministrit, ratifikimi nuk është deklaratë se të gjitha problematikat janë zgjidhur, por pranim i një standardi ndërkombëtar dhe i faktit që mënyra e zbatimit të tij duhet të jetë e matshme edhe nga jashtë.

/rtsh.al/