Ka ndërruar jetë në spital autori i dyshuar i sulmit me armë në qytetin e Krakovës në Poloni, ku mbetën të vrarë gjashtë persona. Policia polake konfirmoi se 24-vjeçari ndërroi jetë në orët e para të mëngjesit të së hënës, pasi ishte plagosur gjatë shkëmbimit të zjarrit me efektivët e policisë.

Ngjarja e rëndë ndodhi të shtunën (7 nëntor), në Sheshin Kryesor të Tregut në Krakovë. I dyshuari hapi zjarr ndaj personave që ndodheshin në zonë, duke shkaktuar gjashtë viktima, katër gra dhe dy burra.

Sipas autoriteteve, efektivët e armatosur mbërritën me shpejtësi në vendngjarje dhe u përfshinë në një shkëmbim zjarri me sulmuesin, të cilin e neutralizuan brenda tre minutash nga nisja e sulmit, duke parandaluar një numër edhe më të madh viktimash.

Hetimet paraprake tregojnë se 24-vjeçari mund të jetë frymëzuar nga ideologjitë e ekstremit të djathtë. Ministri i Brendshëm e cilësoi atë gjithashtu si një ultra-nacionalist, pa dhënë detaje të mëtejshme mbi motivet e sulmit.

Mes gjashtë viktimave janë katër shtetas polakë, një shtetas britanik dhe një grua austriake.

Ndërkohë, kryeministri polak Donald Tusk bëri të ditur se gjatë kontrollit në banesën e të dyshuarit u gjetën edhe tre trupa të pajetë. Policia konfirmoi më vonë se bëhej fjalë për babanë 53-vjeçar, nënën 52-vjeçare dhe motrën 21-vjeçare të të dyshuarit.

Sipas mediave polake, 24-vjeçari kishte leje për armëmbajtje dhe dyshohet se armët mund t’i kishte marrë nga banesa e familjes.

Në total, 16 persona, përfshirë pesë shtetas të huaj, dy efektivë policie dhe vetë sulmuesin, u dërguan në spital pas ngjarjes. Të plagosurit dhe personat e prekur nga sulmi ishin nga Austria, Britania, Gjermania, Portugalia dhe Rusia. Pas tragjedisë, Polonia shpalli dy ditë zie kombëtare.

/rtsh.al/