Komisioni për të Drejtat e Njeriut dhe Mjetet e Informimit Publik zhvilloi seancë dëgjimore me Këshillin Drejtues të Radio Televizionit Shqiptar (RTSH), në kuadër të shqyrtimit të projektligjit “Për Buxhetin e vitit 2027”.

Zv.kryetarja e komisionit, Iris Luarasi, vlerësoi rolin dhe përgjegjësinë e veçantë të RTSH-së si i vetmi televizion që ka detyrimin t’u përgjigjet të gjithë qytetarëve shqiptarë, brenda dhe jashtë vendit.

Gjatë fjalës së saj, Luarasi u ndal te vlerësimet pozitive për RTSH-në, të evidentuara edhe në progresraportin e këtij viti. Sipas saj, ndryshe nga raportet e viteve të mëparshme, ku theksi vendosej kryesisht te problematikat, këtë vit evidentohen edhe përpjekjet dhe rezultatet pozitive të institucionit.

Ajo vlerësoi qasjen e drejtimit të ri të televizionit, si në aspektin administrativ, të drejtuar nga Eni Vasili, ashtu edhe në rolin e Këshillit Drejtues, duke theksuar se këto zhvillime janë pasqyruar edhe në progresraport.

Një tjetër zhvillim pozitiv i përmendur nga Luarasi është përfshirja e RTSH-së në Komitetin e Përbashkët të Industrisë për Matjen e Audiencës. RTSH është bërë anëtare e këtij komiteti në shtator të vitit 2025, një hap që, sipas saj, përbën një zhvillim të rëndësishëm për institucionin dhe për procesin e matjes së audiencës në vend.