Biden kërkon përgjegjësi për vrasjen e shtetases amerikane në Bregun Perëndimor

Presidenti i SHBA Joe Biden ka shprehur indinjimin nga vrasja e aktivistes turko-amerikan nga forcat izraelite në Bregun Perëndimor të pushtuar, duke thënë se të shtënat “janë krejtësisht të papranueshme”.
Presidenti e përshëndeti Aysenur Ezgi Eygi, 26 vjeç, si “një aktiviste, idealizmi i së cilës e bëri atë të udhëtonte në Bregun Perëndimor për të protestuar paqësisht kundër zgjerimit të vendbanimeve”.
Ai vuri në dukje gjetjet e një hetimi paraprak izraelit të fundit, për të cilin tha se vdekja e Eygi-t “ishte rezultat i një gabimi tragjik që rezultoi nga një përshkallëzim i panevojshëm”.
“Qeveria e SHBA-së ka pasur akses të plotë në hetimin paraprak të Izraelit dhe pret akses të vazhdueshëm ndërsa hetimi vazhdon, në mënyrë që të kemi besim në rezultatin. Duhet të ketë përgjegjësi të plotë. Dhe Izraeli duhet të bëjë më shumë për të siguruar që incidente të tilla të mos ndodhin më kurrë”, tha Biden.
Ushtria izraelite shpjegoi të martën se ka “shumë të ngjarë” që Eygi të jetë goditur “indirekt dhe pa dashje” nga forcat e saj.
Eygi, 26 vjeç, shtetase turko-amerikane u vra nga forcat izraelite gjatë një proteste të premten kundër vendbanimeve të paligjshme izraelite në qytetin Beita, jashtë Nablusit.
Eygi, e lindur në Antalia, Turqi në 1998, u shpërngul në SHBA me familjen e saj kur ishte foshnjë dhe u diplomua në qershor në Universitetin e Uashingtonit, ku studioi psikologji, gjuhë dhe kultura të Lindjes së Mesme.
Ajo mbërriti në Bregun Perëndimor të martën e kaluar për të dalë vullnetare me Lëvizjen Ndërkombëtare të Solidaritetit si pjesë e një përpjekjeje për të mbështetur dhe mbrojtur fermerët palestinezë.
Biden tha se dhuna e vazhdueshme në Bregun Perëndimor “po vijon për një kohë të gjatë” dhe u zotua të kërkojë llogari “ekstremistët”.
“Kolonët e dhunshëm ekstremistë izraelitë po çrrënjosin palestinezët nga shtëpitë e tyre. Terroristët palestinezë po dërgojnë bomba makinash për të vrarë civilë. Unë do të vazhdoj të mbështes politikat që i mbajnë të gjithë ekstremistët – izraelitë dhe palestinezë njësoj – përgjegjës për nxitjen e dhunës dhe që pengojnë paqen.” tha ai në deklaratën e së mërkurës.
/rtsh.al/
Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.
Komentet 0
Ende nuk ka komente. Bëhuni i pari që komenton.




