Fermerët francezë marshuan të martën me rreth 350 traktorë në Paris për të protestuar ndaj të ardhurave të ulëta dhe një marrëveshjeje tregtare të BE-së me Amerikën e Jugut. Traktorët hynë në qytet pak pas orës 6 të mëngjesit përmes Porte Dauphine dhe u drejtuan drejt Harkut të Triumfit në Avenue Foch.

Ata kaluan Champs-Elysées dhe lumin Sena, duke bllokuar trafikun në orët e pikut. Protestat u udhëhoqën nga sindikata “Fermerët e Rinj”, të cilët kërkuan veprime të menjëhershme për të mbrojtur sigurinë ushqimore të Francës. Fermerët paralajmëruan se marrëveshja BE-Mercosur mund të sjellë importe më të lira që rrezikojnë tregun vendas.

Marrëveshja pritet të nënshkruhet të shtunën në Paraguai mes BE-së dhe Argjentinës, Brazilit, Uruguait dhe Paraguait. Shumica e vendeve të BE-së e mbështesin marrëveshjen, por Franca, Polonia, Austria, Hungaria dhe Irlanda kundërshtojnë. Fermerët kërkojnë garanci për mbrojtjen e tregut dhe sigurinë e punës së tyre, dhe paralajmëruan se do të vazhdojnë protestat nëse kërkesat nuk merren parasysh.

Gazetar: A. Mata

/rtsh.al/