Pisha e Llazi Spiros, e njohur edhe si “pisha e vetmuar”, qëndron krenare në mes të një are të gjelbër në Shën Pjetër të Fierit, duke tërhequr çdo vizitor me hijeshinë dhe historinë e saj.

Këtë fundjavë, ajo u bë qendra e një feste të veçantë që zgjati nga pasditja deri në mesnatë.

Banorë të zonës dhe vizitorë të shumtë u mblodhën rreth saj, duke krijuar një atmosferë gëzimi dhe bashkimi.

Vallet tradicionale myzeqare, të sjella nga Ansambli, u hodhën rreth e rreth nën qiellin e hapur, ndërsa tingujt e muzikës popullore shtonin emocionin dhe kureshtjen mbi këtë pemë dhe historinë e saj.

Pisha, e cila dikur ndodhej në oborrin e shtëpisë së tij, mban emrin e patriotit Llazi Spiro, një patriot i shquar dhe pjesëmarrës në kryengritjet për Pavarësi.

“Si pasardhës i Llazi Spiros, sot emrin e tij e lartësoj jo vetëm unë, por gjithë banorët e Myzeqesë në këtë aktivitet tejet të rëndësishëm të zhvilluar në zonën e Shën Pjetrit,” u shpreh gazetari Enrik Mehmeti.

Sot, Pisha e Llazi Spiros është më shumë sesa një pemë e bukur. Ajo është simbol i qëndresës, krenarisë dhe identitetit të Myzeqesë.

Festivali që u zhvillua këtë javë synon ta kthejë këtë vend në një destinacion turistik ku vizitorët jo vetëm shijojnë natyrën dhe argëtimin, por rikthehen tek rrënjët e historisë shqiptare.

Gazetare: Laureta Roshi

/rtsh.al/