Kryetari i Parlamentit të Iranit dhe negociatori kryesor i vendit, Mohammad Bagher Ghalibaf, ka deklaruar se Irani duhet të përgatitet për një përballje afatgjatë me sanksionet e Shteteve të Bashkuara të Amerikës. Ai e ka cilësuar këtë situatë si një “luftë ekonomike” të drejtpërdrejtë, ndikimi i së cilës është bërë po aq kritik sa sfidat ushtarake apo kërcënimet kibernetike me të cilat përballet vendi.

Gjatë fjalës së tij në mbledhjen e përbashkët të Komitetit për Koordinim Ekonomik, ku morën pjesë përfaqësues të lartë të qeverisë dhe parlamentit, Ghalibaf theksoi se kërkohet me ngut një konsensus kombëtar dhe vendimmarrje e guximshme për të zbutur pasojat e sanksioneve amerikane mbi ekonominë vendase.

Ai bëri me dije se fokusi kryesor i lidershipit politik duhet të jetë mbrojtja e nivelit të jetesës së qytetarëve, si dhe garantimi i burimeve financiare për forcat e armatosura.

Sipas kryeparlamentarit iranian, qeveria duhet të garantojë se situata financiare e qytetarëve do të jetë e fundit që do të preket nga presioni i luftës dhe i sanksioneve, e njëkohësisht e para që do të përfitojë nga reformat dhe menaxhimi i mirë.

Ai nënvizoi se sfida kryesore nuk është vetëm presioni i jashtëm, por edhe mënyra se si menaxhohen burimet e brendshme, duke bërë thirrje që parlamenti dhe qeveria të veprojnë si një trup i vetëm në menaxhimin e krizës.

Këto deklarata vijnë në një kohë kur Irani përballet me presion të vazhdueshëm ekonomik nga Washington-i, kufizime të rrepta bankare dhe pengesa në eksportin e naftës.

Në këtë kuadër, autoritetet iraniane po diskutojnë zbatimin e masave të ndihmës direkte, si planin e kuponëve ushqimorë për familjet me të ardhura të ulëta, mbështetjen për prodhimin bujqësor dhe sigurimin e likuiditetit për sektorin industrial.

Pavarësisht sfidave, Ghalibaf u shpreh se kjo krizë mund të shërbejë gjithashtu si një mundësi për të reformuar dhe fuqizuar në mënyrë afatgjatë strukturën ekonomike të vendit.

/rtsh.al/