Bota e modës ka humbur sot një nga arkitektët e saj më të mëdhenj. Valentino Garavani, stilisti vizionar që i dhuroi botës elegancën e përjetshme dhe nuancën ikonike të së kuqes, ka ndërruar jetë në Romë në moshën 93-vjeçare.

Lajmi u konfirmua zyrtarisht nga Fondacioni “Valentino Garavani dhe Giancarlo Giammetti”, përmes një deklarate prekëse:

“Ai ndërroi jetë në paqe në rezidencën e tij në Romë, i rrethuar nga dashuria e të dashurve të tij”.

Ceremonia mortore do të zhvillohet të premten, më 23 Janar, në orën 11:00, në Bazilikën e “Santa Maria degli Angeli e dei Martiri” në Piazza della Repubblica.

Nga Voghera në majat e botës

I lindur si Valentino Clemente Ludovico Garavani më 11 maj 1932, në Voghera (Pavia), ai tregoi pasion për modën që në vegjëli. Me mbështetjen e prindërve, Mauro dhe Teresa, ai studioi frëngjisht dhe modë, duke u transferuar më pas në Paris për të punuar me emra si Jean Dessès dhe Guy Laroche.

Në vitin 1957, ai themeloi shtëpinë e modës “Valentino” dhe në vitin 1959 hapi atelienë e parë në “Via Condotti” në Romë. Megjithatë, pika e kthesës që do të definonte perandorinë e tij erdhi në vitin 1960, kur në një kafene të Romës takoi studentin e arkitekturës, Giancarlo Giammetti. Ky takim shënoi fillimin e një partneriteti profesional dhe personal që do të zgjaste një jetë të tërë dhe do ta kthente markën Valentino në një gjigant global.

Stilisti i divave dhe “e kuqja Valentino”

Valentino nuk ishte thjesht një stilist; ai ishte krijuesi i ëndrrave për gratë më të famshme të planetit. Nga Jacqueline Kennedy Onassis, me të cilën nisi një miqësi në vitin 1964, te yjet e Hollywood-it si Elizabeth Taylor, Sharon Stone dhe Linda Evangelista, krijimet e tij ishin sinonim i klasit të lartë.

Ai do të mbahet mend përgjithmonë si krijuesi i “Rosso Valentino” (E Kuqja Valentino), një nuancë specifike e së kuqes që u bë firma e tij vizuale, duke simbolizuar pasionin dhe elegancën femërore.

Trashëgimia Valentino u tërhoq nga drejtimi krijues i shtëpisë së tij të modës në vitin 2007, duke lënë pas një trashëgimi të papërsëritshme. Pas shitjes fillestare te “Mayhoola for Investments” në 2012, grupi luksoz Kering bleu 30% të aksioneve në vitin 2023, duke konfirmuar vlerën e jashtëzakonshme të markës që ai ndërtoi.

Në vitet e fundit, së bashku me Giammetti-n, ai iu përkushtua filantropisë përmes fondacionit të tyre të krijuar në vitin 2016. Sot, Roma dhe bota i thonë lamtumirë “L’Ultimo Imperatore” (Perandorit të Fundit) të modës italiane.

/rtsh.al/