Me pasuritë e saj të shumta natyrore dhe shtrirjen nga brigjet e liqenit të Shkodrës deri në Alpet shqiptare, Malësia e Madhe po tërheq çdo vit gjithnjë e më shumë turistë të huaj.

Sipas drejtuesve të turizmit në këtë bashki, edhe sezoni i sivjetëm veror ka regjistruar rritje të ndjeshme të vizitorëve, si në turizmin liqenor ashtu edhe në atë malor.

“Sezoni akoma nuk ka përfunduar sepse ne e kemi sezonin më të gjatë. Pretendojmë dhe po zhvillojmë një turizëm gjithëvjetor. Mund të flasim për një rritje rreth 10 për qind, përafërsisht flasim gjithmonë, me vitin e kaluar. Në rritje që ka ndikuar shumë është prezenca e turistëve të huaj. Atraksionet turistike janë të shumta, por më kryesoret që dua të theksoj janë Reçi, Tamara, Razma, Boga dhe Lëpusha”, shprehet Eristjan Smajlaj,  Përgjegjësi i Turizmit, Bashkia Malësi e Madhe.

Në fokusin e projekteve të Bashkisë Malësi e Madhe mbetet zhvillimi i qëndrueshëm i turizmit, veçanërisht në zonën e bregliqenit, e cila vitet e fundit është shndërruar në një destinacion të preferuar për turistët që udhëtojnë me kampera.

“Ne jemi fokusuar vitet e fundit te bregu liqenor që sa vjen dhe thith një numër shumë të lartë turistësh. Bregu liqenor, sigurisht që shtrihet pjesa më e madhe e liqenit të Shkodrës dhe krijon një ambient fantastik për të zhvilluar turizëm. Turistët e huaj preferojnë dhe kampizëm mjaft cilësor në këtë zonë”, tha Smajlaj.  

Me atraksione të shumta për turizmin e aventurës, kulturës dhe traditës, Malësia e Madhe vlerësohet si një nga zonat më të veçanta turistike në Shqipëri dhe më gjerë.

Gazetare: A.Hoti

/rtsh.al/