Një natë e vështirë për Qarkun e Shkodrës, ku disa vatra zjarri me përmasa serioze u shfaqën në Shkodër, Vau Dejës dhe Malësi të Madhe.

Në bashkëpunim me Agjencinë Kombëtare të Mbrojtjes Civile (AKMC), Prefektura e Qarkut Shkodër vijoi koordinimin e forcave operacionale vendore dhe qendrore për përballimin e situatës.

Falë ndërhyrjes së pandërprerë të forcave zjarrfikëse, zjarret në Shkodër dhe Malësi të Madhe, si dhe disa vatra në Vau Dejës, u vunë nën kontroll brenda pak orësh. Në Vau Dejës, ndërhyrja vijon ende për shuarjen e plotë të një vatre aktive.

Gjatë gjithë natës, rreth 30 efektivë zjarrfikës punuan pa ndërprerje në terren. Ekipit të MZSH Vau Dejës iu bashkuan forcat e MZSH Shkodër, Pukë dhe Fushë-Arrëz, si dhe efektivë dhe mjete zjarrfikëse të Forcave të Armatosura.

Ndërhyrja e shpejtë bëri të mundur izolimin e zjarrit, shmangien e rrezikut për banesat dhe mbrojtjen e trasesë së linjës së transmetimit.

Aktualisht, një vatër mbetet aktive, ndërsa ekipet vijojnë punën për shuarjen e plotë të saj.

Prefektura e Shkodrës shpreh mirënjohje për efektivët e MZSH-së, Forcave të Armatosura, strukturave të Emergjencave Civile, shërbimit pyjor dhe Policisë, për angazhimin e pandërprerë në terren, si dhe për banorët vullnetarë që iu bashkuan operacionit.