Përmbajtja seksuale e abuzimit të fëmijëve e krijuar me inteligjencë artificiale po përhapet me ritme shqetësuese në internet, ndërsa numri i materialeve të identifikuara këtë vit ka tejkaluar tashmë totalin e vitit 2025.

Sipas të dhënave të Internet Watch Foundation (IWF), vetëm gjatë gjysmës së parë të vitit 2026 janë identifikuar dhe analizuar 6,310 imazhe të krijuara me AI që plotësojnë përkufizimin ligjor të materialeve të abuzimit seksual të fëmijëve. Shifra është rreth 40% më e lartë se totali i mbi 4,500 imazheve të regjistruara gjatë gjithë vitit të kaluar.

IWF, organizata britanike që monitoron materialet e abuzimit në internet në nivel global, thekson se bëhet fjalë vetëm për imazhe statike. Përmbajtja e krijuar me AI është rritur prej disa vitesh, ndërsa rritja më e madhe është vërejtur te videot.

Shumica e imazheve të identifikuara nga analistët paraqisnin vajza dhe fëmijë të moshës 7 deri në 13 vjeç.

IWF ka bërë thirrje për miratimin e rregullave të reja ligjore për inteligjencën artificiale, duke argumentuar se kompanitë teknologjike duhet të detyrohen të ndërtojnë sisteme më të sigurta.

Hannah Swirsky, drejtuesja e politikave në IWF, mbështeti kërkesat e deputetëve për “legjislacion detyrues për AI”, që do t’i detyronte kompanitë të krijonin modele që nuk mund të keqpërdoren për këtë qëllim.

Në Britani, krijimi i materialeve të abuzimit seksual të fëmijëve me AI është i paligjshëm. Gjithashtu është e ndaluar përshtatja e një modeli të inteligjencës artificiale për krijimin e këtyre materialeve apo shpërndarja e modeleve të tilla. Zhvillimi i një modeli të krijuar posaçërisht për prodhimin e materialeve hiper-realiste të abuzimit seksual të fëmijëve mund të dënohet me deri në pesë vite burg.

Qeveria britanike ka theksuar se ligji e ndalon materialin e abuzimit seksual të fëmijëve, pavarësisht nëse ai është krijuar me AI apo në mënyra të tjera.

Ndërkohë, inteligjenca artificiale po përdoret edhe për manipulimin e fotografive të fëmijëve realë. Shërbimi “Report Remove”, i cili ndihmon në heqjen e imazheve intime nga interneti, ka marrë 420 raportime nga fëmijë për fotografi të tyre që dyshohej se ishin falsifikuar ose manipuluar për t’i paraqitur në mënyrë eksplicite. Edhe kjo shifër ka kaluar totalin e vitit 2025, kur u regjistruan 397 raste.

Përballë kësaj situate, Agjencia Kombëtare e Krimit në Britani dhe IWF u kanë bërë thirrje prindërve dhe kujdestarëve të shmangin publikimin e fotografive të fëmijëve në rrjetet sociale ose të përdorin llogari private dhe grupe të kufizuara për ndarjen e tyre.