Përmeti po kthehet në një nga destinacionet më të preferuara turistike në jug të Shqipërisë, duke ofruar një gamë të gjerë mundësish për turizëm historik, kulturor, natyror dhe gastronomik. Interesi i turistëve, vendas dhe të huaj, është në rritje të vazhdueshme.

“Interesi i turistëve për Përmetin ka qenë i lartë. Kemi pasur, këto 2-3 vitet e fundit, kryesisht turizëm outdoor. Kjo lidhet dhe ndërthuret me natyrën e bukur që ka Përmeti, sidomos rafting, ujërat termale, ecjet në male. Kohët e fundit ka filluar edhe ecja me biçikleta. Po ashtu edhe për të njohur Luginën e lumit Vjosë, e cila tashmë është shpallur Park Kombëtar,” thotë Julian Elezi, operator turizmi.

Sipas Elezit, një prej operatorëve të turizmit në zonë, këtë vit është vërejtur një rritje prej 20% e numrit të turistëve në krahasim me një vit më parë.

“Kemi një rritje deri në 20 për qind, statistikat e sakta do t’i publikojmë në fund të vitit. Mendoj që janë turistë të ndërgjegjshëm për një turizëm cilësor. Turistët e huaj janë ata më të shumtët, kemi rritje të francezëve dhe italianëve, por edhe të spanjollëve. Nuk mund të përjashtohen as turistët e tjerë, sidomos ata europianë. Besoj se 70 për qind e turistëve që vijnë në Përmet janë europianë”, thotë operatori i turizmit.

Përmeti dhe rrethinat e tij ofrojnë një përzierje unike të bukurive natyrore si kanionet, burimet termale, mali i Nëmërçkës, si dhe tradita të pasura kulturore dhe kulinarinë karakteristike të zonës.

Gazetare: L. Koçiu

/rtsh.al/