Në Manastirin e Spilesë, në  fshatin Saraqinishtë të bashkisë Gjirokastër, pas përfundimit të projektit të arkitekturës dhe restaurimit të plotë nga ana strukturore dhe arkitektonike të këtij objekti, po vijon puna për restaurimin e afreskeve të tij. Investimi kap vlerën rreth 30 milionë lekë dhe procesi pritet të përfundojë në janar të vitit 2026.

“Po vazhdojmë me restaurimin e afreskut ku ndërhyrja është specifike dhe po kryhet nga disa specialist. Restaurimi do të marrë kohën e tij për shkak të teknikave që përdoren”, u shpreh Ardis Duka, Drejtor në Drejtorinë Rajonale të Monumenteve dhe Trashëgimisë Kulturore në Gjirokastër.

Gjatë kësaj periudhe, vizitueshmëria në këtë objekt kulti mbetet e lejueshme, duke respektuar masat e sigurisë.

“Ka pasur në mënyrë periodike vizitor të ndryshëm të cilët janë dhe të aventurës por gjatë kësaj periudhe janë respektuar masat e sigurimit teknik”, tha ai.

Ky objekt kulti përfaqëson një vlerë të rrallë historike dhe shpirtërore, i njohur për arkitekturën karakteristike dhe ikonografinë e pasur që ruan prej shekujsh.

/rtsh.al/