Nis sot viti i ri akademik në universitetet shqiptare. Rreth 20 mijë studentë pritet të ulen për herë të parë në auditorët e universiteteve, pas përfundimit të dy raundeve të para të regjistrimeve.

Ndërkohë, procesi i pranimeve do të vijojë edhe me një raund të tretë. Sipas gazetares së RTSH-së, Keti Toroveci, ky raund do të hapet më 8 tetor dhe do të zgjasë deri më 21 tetor.

“Do të jetë një fazë e hapur, ku të gjithë studentët që kanë interes për t’u regjistruar do të mund të aplikojnë në programet ku ka ende vende të lira”, bëri të ditur Toroveci në një lidhje të drejtpërdrejtë me emisionin “Mirëmëngjes Shqipëri – Aktualitet”.

Bazuar në eksperiencat e viteve të mëparshme, në raundin e tretë pritet të regjistrohen rreth 1 mijë studentë të tjerë. Me përfundimin e të gjitha raundeve, numri i studentëve të regjistruar në vitin e parë akademik pritet të arrijë në rreth 21 mijë. Ndër degët që kanë ezauruar tashmë kuotat janë Mjekësia e Përgjithshme, Stomatologjia, Farmacia, Inxhinieria dhe Informatika. Raundi i tretë do t’u japë mundësi kandidatëve që nuk kanë siguruar ende një vend në universitet që të zgjedhin mes programeve ku kanë mbetur kuota të lira. Sipas të dhënave në të gjithë vendin janë gjithsej 120 mijë student në total që do të ulen në auditorë.

/rtsh.al/