Përplasja e valëve vdekjeprurëse të të nxehtit, zjarreve masive në Evropë e Amerikën e Veriut dhe mbinxehja e oqeaneve kanë krijuar përshtypjen e një viti me nxehtësi ekstreme. Megjithatë, sipas të dhënave klimatike, viti 2026 renditet aktualisht i treti në librat e rekordeve — pas viteve 2024 dhe 2025. Ekspertët paralajmërojnë se kjo situatë mund të ndryshojë me shpejtësi gjatë muajve në vijim me forcimin e fenomenit natyror “El Niño”.

Faktori “El Niño” dhe ngrohja e oqeaneve

Ndryshe nga sa mund të besohet, nxehtësia ekstreme e kësaj vere nuk i atribuhet ende fenomenit “El Niño”, efektet e të cilit pritet të shfaqen plotësisht pas pak muajsh. Temperatura ditore e sipërfaqes së detit ka thyer rekorde pothuajse çdo ditë që nga qershori, me rreth 82% të sipërfaqes oqeanike globale që përjeton valë të nxehti detar.

“Shkaku i nxehtësisë rekord është ndryshimi i klimës në sfond. Dhe është një kontribut shumë më i madh — shumë, shumë më i madh — sesa El Niño, i cili është vetëm një e dhjeta deri në dy të dhjetat e një shkalle përveç atij trendi afatgjatë.”, kështu shpjegoi shkencëtari i klimës në Climate Central, Zachary Labe, duke theksuar se djegia e lëndëve fosile mbetet motori kryesor i krizës aktuale.

Parashikimet për vitet 2026 dhe 2027

Ekspertët e klimës nënvizojnë se shanset që viti 2026 të përfundojë si më i nxehti i regjistruar po rriten me shpejtësi.

Zeke Hausfather nga Berkeley Earth llogarit se ekziston një shans prej 35% që viti 2026 të tejkalojë vitin 2024, një parashikim ky që ka ardhur në rritje të vazhdueshme nga vetëm 7% që ishte në mars.

Ish-shkencëtari i NASA-s, James Hansen, vëren se meqenëse oqeanet mbulojnë mbi 70% të sipërfaqes së Tokës, ekziston një vonesë prej një muaji e gjysmë mes nxehtësisë oqeanike dhe ngritjes së temperaturës mesatare globale.

Pavarësisht renditjes përfundimtare të këtij viti, komuniteti shkencor është pothuajse i njëzëshëm se viti 2027 do të thyejë çdo rekord historik me një diferencë të madhe.

Shkencëtarët tërheqin vëmendjen se valët e të nxehtit po godasin veçanërisht natën në zona ku popullsia nuk është e mësuar me temperatura ekstremisht të larta, duke shkaktuar pasoja direkte në shëndetin publik dhe produktivitetin e shoqërisë.

/rtsh.al/