Në universitetet publike të vendit janë 32 programe studimi nga 650 në total, të cilat rezultojnë me asnjë student të regjistruar.

Problematikat shfaqen kryesisht në universitet rajonale, ku preken degët e shkencave ekzakte, atyre sociale dhe gjuhëve të huaja.

Drejtori i Rrjetit Akademik Shqiptar, Arjan Xhelaj, nisur nga eksperienca e viteve të mëparshme,  sqaron se çfarë ndodh me këto programe.

“Nëse universitetet e vërejnë që vitet e fundit ka pasur interes, ata nuk është se i mbyllin, por i ‘ngrijnë’ për njëfarë kohe. Nëse nuk do të vijnë më kërkesa nga maturantët për këto fusha, atëherë mbase edhe i mbyllin ose i riorganizojnë. Për programe të caktuara, që ndër vite nuk kanë rezultuar të suksesshme, por në një universitet tjetër rajonal janë të suksesshme, mund të ketë edhe një riorientim. Një pjesë e studentëve mund të lëvizet. Pastaj shikohen elementet ekonomike…” thotë z. Xhelaj.

Në kryeqytet, situata është krejt ndryshe. Veç dy programeve, atij të “Gjuhës, letërsisë dhe qytetërimit hispanik“, i cili rezulton me katër studentë të regjistruar, dhe programit të “Përkthimit dhe interpretimit në gjuhën greke dhe angleze“, ku nuk figuron asnjë student i regjistruar, programet e tjera, madje edhe ato që kanë qenë problematike ndër vite, rezultojnë me një rritje kërkese si pasoje e riorganizimit të tyre.

“Tirana ka vetëm dy programe pa regjistrime. Të tjerat kanë pasur regjistrime mjaftueshëm për të vijuar me programet e studimit. Një universitet që ka 150 programe studimi është një ecuri shumë e mirë, do të thoja,” shton drejtori i RRASH-it.

Deri më tani rezultojnë mbi 21 mijë e 600 maturantë të regjistruar në universitete.

Programet më të preferuara për këtë vit rezultojnë ato të Mjekësisë, Arkitektura dhe inxhinieritë, kuotat e të cilave u plotësuan që në raundin e parë.

Gazetare: Keti Toroveci

/rtsh.al/