Prej një viti, në shkollën “Bajram Abdiu” në Bicaj, nxënësit kanë një hapësirë të veçantë ku mund të njihen nga afër me historinë, kulturën dhe traditat e krahinës së Lumës. Muzeu etnografik, i ngritur me nismën dhe angazhimin e mësuesve e nxënësve, ka mbledhur objekte të trashëguara ndër breza, duke e kthyer shkollën në një hapësirë ku e shkuara takohet me brezat e rinj.

Krahas objekteve, në muze janë përmbledhur edhe materiale të printuara që pasqyrojnë momente dhe figura të rëndësishme të historisë së Lumës, si dhe historikun e vetë shkollës “Bajram Abdiu”. Kjo hapësirë shërben edhe si një mënyrë praktike për t’ua përcjellë nxënësve njohuritë për traditën dhe identitetin kulturor të zonës.

Puna për krijimin e muzeut nisi në vitin 2023 dhe gjatë viteve vijoi me mbledhjen, ruajtjen dhe sistemimin e objekteve. Në kuadër të këtij projekti janë zhvilluar edhe orë të hapura mësimore, duke u dhënë nxënësve mundësinë të mësojnë për historinë dhe trashëgiminë e Lumës përmes objekteve autentike.

Mësuesit synojnë që muzeu të pasurohet më tej me objekte dhe materiale të reja, në mënyrë që kjo hapësirë të shërbejë jo vetëm si një koleksion i trashëgimisë së zonës, por edhe si një pikë referimi për brezat e rinj.

Gazetare: Sh. Elezaj

/rtsh.al/