Punimet për hyrjen e re të Shkodrës po vijojnë me intensitet, ku ka nisur edhe hedhja e shtresave asfaltike për të lehtësuar qarkullimin e automjeteve. Këtë zhvillim e ka bërë të ditur tw enjten Kryeministri Edi Rama, i cili ka ndarë në rrjetet sociale pamje nga kantieri.

“Kantieri i punimeve për hyrjen e re të Shkodrës, ku ka nisur hedhja e shtresave asfaltike për të lehtësuar qarkullimin e automjeteve,” shkruan Rama.

Ky projekt i rëndësishëm, i financuar nga Fondi Shqiptar i Zhvillimit dhe i mbështetur nga qeveria, ka si qëllim transformimin e kësaj zone kyçe të qytetit në një hapësirë shumëfunksionale dhe argëtimi.

Përveç përmirësimit të infrastrukturës rrugore, projekti ambicioz përfshin krijimin e një parku prej 17-18 hektarësh. Ky park do të ofrojë mjedise moderne dhe argëtuese, duke përfshirë:

•     Mjedise sportive

•     Shëtitore për këmbësorë dhe biçikleta

•     Pika panoramike për të shijuar pamjet mahnitëse të liqenit

•     Hapësira për aktivitete dhe koncerte

Gjithashtu, pjesë e këtij projekti janë edhe ndërtimi i fushave të reja sportive dhe një mol i ri, i cili do të sigurojë lidhje me mole të tjera ekzistuese në Shirokë dhe Zogaj. Kjo do të pasurojë ofertën turistike dhe rekreative të zonës.

Me përfundimin e këtyre punimeve, hyrja e Shkodrës pritet të marrë një pamje krejtësisht të re, duke shërbyer jo vetëm si një rrugë hyrëse, por edhe si një qendër e re për argëtim dhe rekreacion për banorët dhe vizitorët.

/rtsh.al/