Kërkesat për t’u trajnuar në profesione që kërkohen në tregun e punës janë gjithnjë në rritje. Ky trend ka bërë që Qendra e Formimit Profesional në Shkodër të zgjerojë vazhdimisht gamën e kurseve të trajnimit. Së fundmi, në listën e programeve është përfshirë edhe fusha e zejtarisë, me disa profile të reja që synojnë rikthimin e vlerave tradicionale dhe zhvillimin e aftësive praktike për tregun lokal.

“Një risi tashmë është dhe fusha e zejtarisë, punime me grep dhe makram.  Kemi menduar të hapim këtë kurs në mënyrë që të lidhim hobin me profesionalizmin. Kemi bërë një punë shumë të madhe për hapjen e kësaj kurrikule dhe do të përdoret në të gjitha qendrat e Shqipërisë”, u shpreh Irma Lohja, drejtuese e Qendrës së Formimit Profesional, Shkodër.

Sipas drejtueses së qendrës, aktualisht janë në proces hartimi edhe kurrikula të tjera, të cilat bazohen në kërkesat reale të tregut të punës dhe nevojat e bizneseve.

“Qendra është në punim formimi tezgjahu për të cilën ka kërkesa sepse këto kurrikula hartohen në lidhje me kërkesat e tregut”, tha ajo.

Vetëm gjatë këtij viti, nga janari deri në shtator, Qendra e Formimit Profesional në Shkodër ka ofruar 25 kurse në drejtime të ndryshme, ku janë trajnuar rreth 700 punëkërkues, kryesisht të rinj që synojnë integrimin në tregun e punës ose nisjen e një veprimtarie të pavarur.

Gazetar: A. Hoti

/rtsh.al/