Gjirokastra vijon të mbetet një nga destinacionet më të preferuara për turistët. Qyteti i gurtë nuk e humbet sharmin as në ditët e ftohta të janarit e shkurtit; përkundrazi, atmosfera dimërore i shton një tjetër dimension bukurisë historike dhe arkitekturore.

Vizitorë vendas e të huaj zgjedhin të eksplorojnë rrugicat muzeale, kalanë madhështore dhe të njihen me traditat që ky qytet ofron në çdo stinë.

“Jam i mahnitur nga Gjirokastra. Nuk e prisja që gjatë ditëve të ftohta të dimrit të kishte kaq shumë njerëz. Rrugicat me kalldrëm karakteristike dhe atmosfera e bëjnë këtë përvojë të paharrueshme,” – u shpreh një prej turistëve të huaj.

Një tjetër vizitore tha për RTSH: “Nuk e prisja që një qytet kaq i vogël të kishte kaq gjallëri edhe në mes të dimrit. Gjirokastra më mahniti me atmosferën, arkitekturën dhe rrugicat e ngrohta.”

Nga ana tjetër, operatorët turistikë raportojnë interes të qëndrueshëm nga turistë vendas dhe të huaj, ndërsa strukturat akomoduese vijojnë të jenë funksionale edhe jashtë sezonit veror.

Gazetare: Enkeleda Domeri

/rtsh.al/