Amfiteatri Antik i Durrësit hyn në një etapë të re të ruajtjes dhe studimit, 60 vite pas zbulimit të tij. Lajmin e ka bërë të ditur ministri i Turizmit, Kulturës dhe Sportit, Blendi Gonxhja. Sipas ministrit, ka nisur zbatimi i Planit të Konservimit dhe Gërmimeve Arkeologjike, një investim i Ministrisë së Turizmit, Kulturës dhe Sportit, ndërsa vijojnë edhe kërkimet në kuadër të projektit italo-shqiptar “Durrësi Mesjetar – Amfiteatri”.

Ky projekt, i cili zhvillohet prej vitit 2018, ka kontribuar në pasurimin e të dhënave mbi historinë dhe zhvillimin e monumentit antik. Paralelisht me punën kërkimore dhe konservuese, Amfiteatri i Durrësit vijon të tërheqë një numër në rritje vizitorësh. Sipas të dhënave të publikuara nga ministri Gonxhja, gjatë periudhës janar-gusht 2026 monumenti është vizituar nga 28,823 persona, rreth 16.3% më shumë krahasuar me të njëjtën periudhë të vitit të kaluar.

“Gjashtë dekada pas zbulimit, puna për ta njohur, mbrojtur dhe përcjellë këtë pasuri te brezat e ardhshëm vazhdon”, është shprehur Gonxhja.

Amfiteatri Antik i Durrësit mbetet një nga monumentet më të rëndësishme arkeologjike të vendit, ndërsa ndërhyrjet e reja synojnë ruajtjen e tij dhe thellimin e studimeve mbi historinë e monumentit.

/rtsh.al/