Antonio Costa, më 1 dhjetor zyrtarisht President i KiE. Javën e ardhshme pritet të takojë liderët e rajonit

Botë | 2 vite më parë

Presidenti i zgjedhur i Këshillit Evropian, Antonio Costa, do të marrë zyrtarisht detyrën në udhëheqjen e institucionit,të dielën e 1 dhjetorit.

Gjatë ceremonisë që do të mbahet, presidenti në largim i Këshillit Evropian, Charles Michel, do i kalojë stafetën Antonio Costas, portugezit të parë dhe socialistit të parë në krye të institucionit, për mandatin dyvjeçar e gjysmë.

Për sa u përket pjesëmarrësve të tjerë në ceremoni, pritet edhe prezenca e presidentes së Komisionit Europian, Ursula von der Leyen, me të cilën Antonio Costa ruan një marrëdhënie të mirë.

Presidenti i sapozgjedhur i Këshillit Evropian ka premtuar më herët “unitet mes të gjithëve” liderëve të BE-së gjatë udhëheqjes së institucionit.

Dy ditë pas marrjes së detyrës, Costa pritet të mbledhë në Bruksel, liderët e Ballkanit Perëndimor.

Sipas Rel, takimi do shërbejë për njohjen nga afër të liderëve të gjashtë vendeve të rajonit, si dhe për të diskutuar mbi përgatitjet e një samiti të posaçëm të BE-së dhe Ballkanit Perëndimor, i cili do të zhvillohej më 18 dhjetor në Bruksel.

Dy javë më parë, presidenti në largim i Këshillit Evropian, Charles Michel, tha se beson se ish-kryeministri portugez do të jetë një “gardian i unitetit” midis Shteteve Anëtare, pasi BE përballet me sfida ekonomike dhe gjeopolitike.

Costa pason në këtë detyrë Charles Michel, në detyrë që nga viti 2019 dhe i cili përfundon mandatin e tij më 30 nëntor 2024, në një periudhë të shënuar nga kriza të tilla si dalja e Mbretërisë së Bashkuar nga Bashkimi Evropian, pandemia Covid-19, pushtimi rus në Ukrainë. dhe, së fundmi, rindezja e tensioneve në Lindjen e Mesme.

/rtsh.al/


Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.

Komentet 0

Ende nuk ka komente. Bëhuni i pari që komenton.

Të ngjashme