Një aksident rrugor ka ndodhur në bajpasin e autostradës në Lushnje, në afërsi të rrethrrotullimit të Plukut. Një automjet i tipit “Ford” ka dalë nga rruga kryesore, duke u përplasur me murin rrethues të një biznesi privat dhe me një shtyllë ndriçimi.

“Një automjet tip Ford është përplasur me murin e një biznesi dhe ka rrëzuar një shtyllë ndriçimi e më pas ka përfunduar i përmbysur në njërën anë pas disa rrotullimeve,” raporton RTSH-24 nga vendngjarja.

Si pasojë e përplasjes së fortë dhe rrotullimeve të mjetit, drejtuesi ka pësuar dëmtime trupore.

Dërgimi i të plagosurut në spital dhe hetimet e policisë

Menjëherë pas sinjalizimit për aksidentin, në vendngjarje ka mbërritur shërbimi mjekësor i urgjencës për t’i dhënë ndihmën e parë drejtuesit të automjetit.

“Drejtuesi i mjetit është dërguar me urgjencë nga ambulanca e thirrur në vendngjarje për në spitalin e Lushnjes ku po merr ndihmën mjekësore,” informon RTSH-24.

Në vendin e ngjarjes kanë shkuar forcat e Policisë Rrugore dhe ekspertët e policisë shkencore për rregullimin e qarkullimit dhe zbardhjen e rrethanave të ngjarjes.

“Policia e qarkullimit në vendngjarje po dokumenton shkaqet e aksidentit dhe po disiplinon trafikun. Ndërkohë policia shkencore po kryen ekspertizën për të përcaktuar dhe shkaqet e aksidentit,” sqarohet më tej.

Nga këqyrja paraprake e vendit të ngjarjes dhe gjurmëve të lëna në rrugë, hetuesit dyshojnë se shkak kryesor për humbjen e kontrollit të mjetit ka qenë mosrespektimi i kufizimeve të shpejtësisë.

“Paraprakisht dyshohet se drejtuesi i mjetit ka qenë duke ecur me shpejtësi tej normave dhe ka humbur kontrollin mbi mjet dhe ka dalë nga rruga ku edhe është përplasur me objektin në anë të rrugës,” raporton RTSH-24 nga vendngjarja.

/rtsh.al/