Në Kolegjin e Mbrojtjes dhe Sigurisë ka startuar viti i ri akademik për tre kurse profesionale, ku marrin pjesë gjithsej 75 oficerë. Nga ky grup, 65 efektivë i përkasin Forcave të Armatosura të Republikës së Shqipërisë, ndërsa 10 të tjerë vijnë nga radhët e Forcës së Sigurisë së Kosovës (FSK).

Gjatë ceremonisë zyrtare të hapjes, Ministri i Mbrojtjes, Ermal Nufi, e cilësoi arsimin profesional ushtarak si shtyllën kryesore për rritjen e kapaciteteve mbrojtëse dhe modernizimin e forcave të armatosura.

“Asnjë kapacitet ushtarak nuk është më i fortë se njerëzit që e drejtojnë, e përdorin dhe e zhvillojnë atë. Prandaj, investimi në dije, profesionalizëm dhe lidership është një prej investimeve më të rëndësishme që mund të bëjmë për sigurinë dhe mbrojtjen e Republikës.”, tha Nufi.

Bashkëpunimi rajonal dhe sfidat e sigurisë kibernetike

Përfshirja e efektivëve të Kosovës në këto programe arsimore u vlerësua si një hap i mëtejshëm pozitiv drejt konsolidimit të bashkëpunimit bilateral ushtarak ndërmjet Tiranës dhe Prishtinës.

Ministri Nufi nënvizoi se përballja me kërcënimet hibride, asimetrike dhe sfidat e sigurisë kibernetike kërkon përgatitjen e drejtuesve që kanë aftësi strategjike analitike dhe vendimmarrëse në mjedise komplekse.

“Ambicia jonë nuk është thjesht të jemi pjesë e Aleancës. Ambicia jonë është të jemi një aleat gjithnjë e më i aftë, gjithnjë e më i përgatitur dhe gjithnjë e më kontribuues në sigurinë kolektive dhe sfidat e përbashkëta.”, deklaroi ministri i Mbrojtjes.

Duke iu drejtuar 75 kursantëve, ministri theksoi se përgjegjësia e tyre shkon përtej një programi studimi, pasi përgatitja profesionale lidhet drejtpërdrejt me aftësinë për të udhëhequr, marrë vendime dhe mbajtur përgjegjësi në shërbim të vendit.

“Në uniformë, profesionalizmi është përgjegjësi; lidershipi është shembull; dhe dija merr vlerën e saj të plotë vetëm kur vihet në shërbim të vendit”, u shpreh ministri Nufi.

Në ceremoni morën pjesë Shefi i Shtabit të Përgjithshëm të Forcave të Armatosura, Gjenerallejtënant Arben Kingji; komandanti i Kolegjit të Mbrojtjes dhe Sigurisë Gjeneralmajor Altin Kurti; Ambasadori i Republikës së Kosovës në Shqipëri, Skënder Durmishi; komandantë, pedagogë, instruktorë dhe të ftuar të tjerë.

/rtsh.al/