Komisioni Europian ka gjobitur gjigantin amerikan të teknologjisë Google me 2.95 miliardë euro, për shkelje të rregullave të konkurrencës në tregun e reklamave online.

Sipas njoftimit zyrtar, Komisioni akuzon Google se ka favorizuar shërbimet e veta të teknologjisë së reklamave, duke abuzuar me pozicionin dominues në treg dhe duke penguar konkurrencën e ndershme.

Komisioni ka urdhëruar kompaninë që të ndalojë menjëherë praktikat e padrejta dhe të zbatojë masa konkrete për të shmangur konfliktet e interesit në zinxhirin e furnizimit të reklamave dixhitale.

Google ka afat 60 ditë për të informuar Komisionin mbi mënyrën se si do të korrigjojë sjelljen e saj.

Nga ana tjetër, kompania ka reaguar duke kundërshtuar vendimin.

Lee-Anne Mulholland, zëvendëspresidente e Google dhe drejtuese globale e çështjeve rregullatore, deklaroi se, “Komisioni ka vendosur një gjobë të pajustifikuar dhe kërkon ndryshime që do të dëmtojnë mijëra biznese evropiane, duke ua vështirësuar atyre fitimin e parave.”

Gjoba ishte planifikuar të shpallej zyrtarisht të hënën nga Shefja e Konkurrencës së BE-së, Teresa Ribera, por vendimi u shty pas ndërhyrjes së Komisionerit të Tregtisë, Maroš Šefčovič, i cili shprehu shqetësimin se masa mund të dëmtonte marrëdhëniet tregtare mes BE-së dhe SHBA-së.

Šefčovič deklaroi më herët këtë javë se ,“Procedurat e brendshme të Komisionit ekzistojnë për një arsye.”

Ky është një nga vendimet më të forta të BE-së kundër një gjiganti teknologjik, duke sinjalizuar një qëndrim më të ashpër ndaj praktikave monopoliste në tregun dixhital.

/rtsh.al/