Komisioni Evropian pritet të prezantojë në dhjetor planin e parë të dedikuar për shëndetin kardiovaskular, një nismë e re që synon të adresojë barrën më të madhe shëndetësore në Bashkimin Evropian.

Sipas një drafti të siguruar nga Euractiv, ekzekutivi i BE-së po përgatit masa të forta parandaluese, përfshirë vendosjen e taksave mbi ushqimet ultra të përpunuara dhe pijet e gazuara me alkool deri në vitin 2026.

Plani, i strukturuar nga Komisioneri i Shëndetësisë Olivér Várhelyi mbi tre shtylla kryesore – parandalimin, zbulimin e hershëm dhe trajtimin – shihet si një vazhdim i Planit Evropian për Shkatërrimin e Kancerit.

Drafti thekson se BE-ja nuk ka vepruar mjaftueshëm për të frenuar faktorët e rrezikut si alkooli, duhani, produktet e reja me nikotinë dhe ushqimet e përpunuara, edhe pse parandalimi konsiderohet mënyra më efektive për të ulur rastet e sëmundjeve të zemrës.

Sipas dokumentit, Komisioni synon që deri në vitin 2035 të arrijë një ulje prej 20% të vdekshmërisë kardiovaskulare, si dhe të rrisë ndjeshëm diagnostikimin dhe kontrollin e hipertensionit, diabetit dhe obezitetit.

Për këtë qëllim, do të nisë projekti “BE-ja kujdeset për zemrën tuaj”, i cili do të ndihmojë shtetet anëtare të hartojnë plane kombëtare për sëmundjet kardiovaskulare deri në vitin 2027.

Në kuadër të planit, Komisioni do të propozojë gjithashtu rishikimin e rregullave të kontrollit të duhanit deri në vitin 2027, me synimin që përdorimi i tij të bjerë nën 5% deri në vitin 2040.

Po ashtu, pritet të krijohet një rrjet qendrash të specializuara kardiovaskulare në të gjithë BE-në dhe një inkubator prej 20 milionë eurosh për përdorimin e inteligjencës artificiale në zbulimin e hershëm dhe mjekësinë e personalizuar.

/rtsh.al/