Donjeta Bali është prezantuar këtë të enjte (29 maj) si drejtoresha e re e Qendrës Spitalore Universitare “Nënë Tereza”. Prezantimi u bë nga ministrja e Shëndetësisë, Albana Koçiu, e cila vlerësoi Balin si një profesioniste me përvojë, e përkushtuar për përmirësimin e shërbimeve shëndetësore dhe vendosjen e pacientit në qendër të kujdesit.

“Prof. Dr. Donjeta Bali do të jetë drejtuesja e re e Qendrës Spitalore Universitare “Nënë Tereza”. Një profesioniste me përvojë, e cila merr drejtimin e institucionit më të madh spitalor në vend me përkushtimin për të çuar përpara standardet e kujdesit shëndetësor dhe shërbimin ndaj pacientëve

Suksese në këtë detyrë të rëndësishme, me bindjen se në qendër do të jetë gjithmonë pacienti dhe shërbimi cilësor! Një falënderim i veçantë për Prof. Dr. Alma Cani, për punën dhe kontributin e saj gjatë drejtimit të QSUT-së, në një periudhë sfidash të shumta”, shkruan Koçiu.

Bali zëvendëson Prof. Dr. Alma Canin, e cila dha dorëheqjen pas më pak se një viti në detyrë.

Koçiu shprehu falënderime për kontributin e Canit gjatë një periudhe me sfida të shumta në drejtimin e institucionit më të madh spitalor në vend.

/rtsh.al/