E fokusuar në turizëm, Lezha do të nxjerrë edhe gjatë vitit 2026 udhërrëfyes turistikë të certifikuar, për t’i shërbyer sa më mirë këtij sektori.

Bashkia do të mundësojë pagesën e 50% të vlerës së certifikimit, ndërsa pjesa e mbetur do të mbulohet nga kursantët.

Gjatë takimit sensibilizues për nxitjen e të rinjve që të bëhen pjesë e kursit, Drejtori i Turizmit në Bashkinë Lezhë, Renaldo Xhani, tha se guidat e certifikuara janë një domosdoshmëri për Lezhën, që po njeh çdo vit rritje të numrit të vizitorëve.

“Vitin e fundit po shtohet numri i turistëve. Kemi parë që është shumë e nevojshme për guida, ku operatorët turistikë kërkojnë guida për t’i shoqëruar edhe në vende të tjera përveç plazheve, siç kemi Memorialin e Skënderbeut, kalanë apo kishat e vjetra dhe fenomene të mira të agroturizmit, për t’i ofruar ditë të ndryshme dhe për të punësuar komunitetin e zonës”, deklaroi Xhanaj.

Me këtë lëvizje, e cila vijon prej tre vitesh, Bashkia Lezhë synon të ndikojnë tek turizmi i sigurt dhe cilësor.

Kurikula e akredituar nga Ministria e Turizmit dhe Mjedisit do të jetë e plotë dhe e azhornuar me të rejat në sektorin e turizmit, duke mundësuar që në tre muaj këtyre të rinjve t’u jepet njohuri e plotë për historinë, kulturën dhe resurset natyrore.

/RTSH/