Qarku Shkodër këtë sezon ka mirëpritur më shumë turistë. Prefektja e Qarkut Shkodër, njëherësh drejtuese e task-forcës në terren, Majlinda Angoni, tha se ka pasur përmirësime në shërbimin e pastrimit dhe në menaxhimin e hapësirave në plazhe. Aktualisht, 60% e hapësirës së plazhit është nën administrimin e Bashkisë Shkodër.

“Krahasuar me vitet e kaluara, gjashtëmujori i parë i këtij viti ka shënuar një rritje të turistëve në qarkun e Shkodrës. Ky numër i ardhjes së turistëve ka të bëjë edhe me rritjen e cilësisë së shërbimit. Kemi një përmirësim të infrastrukturës, është përmirësuar ndjeshëm niveli i pastërtisë. 60 për qind e plazhit menaxhohet nga bashkia dhe kjo padyshim ka rritur edhe frekuentimin ditor të plazheve,” tha Angoni.

Ajo vlerësoi edhe bashkërendimin e punës mes Policisë Vendore dhe asaj Bashkiake, veçanërisht në përballimin e trafikut në hyrje të Shkodrës.

“Dua të theksoj edhe punën e mirë të Policisë Vendore që, së bashku me Policinë Bashkiake, janë duke bashkëpunuar në monitorimin dhe lehtësimin e aksesit rrugor, pasi këto ditë trafiku është tepër i shtuar,” u shpreh Angoni.

Disa ditë më parë, prefektja mblodhi task-forcën në Velipojë, ku kërkoi angazhim maksimal nga çdo strukturë.

Gazetare: M. Gjoni

/rtsh.al/